La vente de la seigneurie de La Fons-Saint-Mageran à un banquier italien

L'acte de vente ci-dessous est un texte assez long (une quinzaine de pages) citant quantité de personnages. Marie de Beaucaire, duchesse douairière de Penthièvre, veuve de Sébastien de Luxembourg, vend une seigneurie et quelques terres voisines et droits à un banquier d'origine italienne, pour la somme de 17 500 écus, soit un peu plus de 3 millions d'euros de 2021 (valeur monétaire très relative, citée seulement ici à titre indicatif).

L'acte est passé devant notaires et énumère à plusieurs reprises les terres concernées et leurs dates d'acquisition par le père de Marie Beaucaire. Celle-ci, ainsi que l'acheteur, se font représenter par des mandataires ("procurateurs") pour procéder à l'achat. Nous faisons figurer à la fin de la transcription un tableau des personnages cités dans le document, afin d'en faciliter la compréhension.

Les unités monétaires présentes dans le document sont l'écu, parfois figuré par un signe non-reproductible et que nous retranscrivons pour cette raison sous la forme développée "[écus]", et la livre tournois (un écu vaut trois livres), figurée sous diverses formes ("Lz", "ttz", ou symbole "₶"). Nous laissons autant que possible les unités monétaires et les mots courants sous la forme dans laquelle ils apparraissent dans le texte ("Sr." pour "sieur", "lesd." pour "les dits", etc.). Les parties soulignées des mots dans la transcription signalent ce qui dans le texte original fait l'objet d'une abréviation du mot, pratique courante à l'époque. Les mots barrés sont la reproduction des mots barrés dans le document manuscrit, quand ils sont lisibles.

⸎⸎⸎⸎⸎

                 A tous ceulx etc. Furent presens, nobles hommes M^es Claude Le Prevost Sr. d'Andilly¹, conseiller du roy et refferendaire² en la chancellerie, advocat en parlement, et Guillaume de Bruc, seigneur de la Vieillecourt³ ou⁴ nom et comme procureurs⁵ de très haulte et puissante princesse Dame Marie de Beauquere⁶ vefve de feu très hault et puissant prince Messire Sebastien de Luxembourg⁷, en son vivant duc de Penthevre, pair de France, viconte de Martigues, Dame de Riés en Poictou⁸, de Couetmen⁹ et des secheries¹⁰ de Cornouaille en Bretaigne et de la baronnie de La Fons-Sainct-Mageran, Thiroiseau¹¹, suffisammant fondez de lettres de procuration qui seront transcriptes vers la fin de des presentes. Lesquelz de leurs bons grez et bonnes voluntez, sans aucune contraincte, si comme¹² ilz disoient, recognurent et confesserent en la presence et par devant lesd. notaires comme en droict jugement par devant nous, avoir vendu, ceddé, quicté, transporté et delaissé du tout dès maintenant à tousjours, et promectent esd.¹³ noms de procureurs de lad. Dame garants, delivrer et deffendre et faire valloir en jugement et dehors de tous troubles, destourbiers¹⁴, dons, douaires, debtes, ypothecques, evictions, alliennations, et de tous autres empeschemens generallement quelz concques, à Charles de Cappony¹⁵, escuyer, Sr. d'Amberieu¹⁶, guidon¹⁷ de la compaigny de cinquante hommes d'armes de Mr. le senechal de Lyon¹⁸, absent, Pierre Anthoine de Tebalducci-Jacomini¹⁹, gentilhomme florentin demourant à [mot biffé] Paris à ce present achepteur, stippulant et acceptant pour led. Sr. de Cappony Sr. d'Ambrieu ses hoirs et ayans cause à l'advenir et duquel led. de Jaccomini dict estre procureur, les baronnie, terres et seigneuries et autres heritaiges et droictz cy-après declarez à lad. Dame de Martigues apparternant de son propre et par partaige faict avec ses coheritiers, de feu hault et puissant Sr. Messire Jehan de Beauquere²⁰ luy vivant chevalier de l'ordre du roy, Sr. desd. lieux et de Puiguillon²¹, pere de lad. Dame. Assavoir : lad. baronnie, teres, seigneurie de la Fons-St.-Mageran, assize et scituee ès pais et duchez de Bourbonnois et d'Auvergne, concistant en maison forte flancquee de quatre tours avec ses appartenances et deppendances à plain speciffiees et declarees par le menu au contract d'acquisition d'icelle baronnie, terre et seigneurie de La Fons-Sainct-Mageran, faicte par led. feu Sr. de Puiguillon de Jehan de Bayard²², escuier, le unze^me jour d'avril mil V^C soixante douze, passé par devant Cayart²³ et Boreau²⁴ aussy notaires aud. Châtelet, et de lettres de sentences et adjudications par decret²⁵ faicte d'icelle baronnie, terre et seigneurie. Item la terre et seigneurie de Thiroiseau avec toutes ses appartenances et dependances, assize et scituee aud. pais et duché de Bourbonnais par led. feu Sr. de Puiguillon, acquise de Claude de Ballore²⁶, Sr. dud. lieu et de Moulinneuf²⁷, le vingt-cinq^me jour de febvrier mil V^C soixante-dix-huict pour la somme de quinze cens escuz sol. Item le droict et faculté de remeré²⁸ par led. feu Sr. de Puiguillon acquis le XIX^me jour de juliet oud. an mil V^C LXXII²⁹ dud. de Bayart qui s'estoit reservé pouvoir recouvrer la vigne de Margazat³⁰ près Briailles³¹ contenant huict œuvrés³² de vingne et ce pour le pris de cent escuz sol. Item ung pré scitué en la parroisse de Sainct-Didier au terrouér de la Forest³³, acquis par led. feu Sr. de Puiguillon de Gilbert Olivier le XIX^e jour de novembre mil V^C LXXIIII pour la somme de XXVIII^ttz. Item, ung bois taillis appellé Le Bois-Taillis, acquis par le Sr. de Puiguillon le IX^e jour de janvier mil V^C LXXV de Philippes de Treilles³⁴ Sr. de Jaulnay³⁵ et d'Eloyse de Brezolles³⁶, sa femme, pour la somme de III^C Lz. Item, une pièce de terre assize aud. terrouér de La Fons, contenant quatre septiers³⁷ ou environ, acquise par led. Sr. de Puiguillon de Loys d'Acques³⁸ le XIIII^e jour de may mil V^C LXXVIII pour la somme de XXI [écus] II tz. Item, une myne³⁹ [de] froment mesure [de] St-Porsain de cens⁴⁰ port[ans] directe seigneurie payable sur les choses rapportees au contract aussy acquis par led. feu Sr. de Puiguillon dud. Philippes de Treilles Sr. de Jaunay le XXII^e jour de janvier mil V^C LXXIX pour la somme de XXV Lz. Item, ung pré assis en la parroisse de St.-Didier au terrouér de Chambons⁴¹ par icelluy feu Sr. de Puiguillon, acquis dud. Sr. de Jaunay et sa femme le XVI^e jour d'avril oud. an mil V^C LXXIX pour la somme de LIII [écus] et I tz. Item, une piece de terre scituee au terrouér de la Coste Saint-Pons⁴², avec ung petit pré tenant ensemble, le tout contenant huict septerees⁴³ de terre, par icelluy feu Sr. de Puiguillon acquis, de Gilbert Gabriel et Claude Fauchere⁴⁴ le XIIII^e jour de juliet oud. an mil V^C LXXIX pour la somme de XXII [écus] sol. Item, certaines pieces de terre, l'une contenant dix quartonnees⁴⁵, l'autre six, l'autre pareillement six, et la quatre^me une septeree, par icelluy feu Sr. de Puiguillon acquises, de feu Messire Jehan de Lesnat⁴⁶, presbtre, pour la somme de III [écus] et I tz le XX^e jour de janvier M V^C IIII^XX. Item, ung pré appellé le pré de Réveillon par icelluy feu Sr. de Puiguillon acquis, de Patrocle Courgiat⁴⁷ le XXI^e novembre oud. an. Item, plusieurs rentes et cens qui estoient deubz aux abbé de St.-Gilbert⁴⁸ et prieur dud. St.-Poursain⁴⁹, par icelluy feu Sr. de Puiguillon acquis, comme plus au long le contiennent les lettres de lad. acqui[sition]⁵⁰. Et generallement lesd. vendeurs esd. noms vendent et transporte[nt] comme dessus aud. Sr. achepteur toutes autres choses quelz concques estans des appartenances, appendances⁵¹ et deppendances desd. baronnies, terres et seigneurie des Fondz-St.-Mageran, Thyroiseau et toutes autres choses acquises par icelluy feu Sr. de Puiguillon esd. terres et seigneuries et aux environs annexees à icelles, tant en heritaiges, cens, rentes, et debvoirs quelz concques, sans aucune chose en excepter, retenir, ny reserver par lesd. Srs. vendeurs esd. noms, encores qu'ilz ne soient cy speciffiez ne declarez par le menu. Et en ce touteffois non comprins ce que led. feu Sr. de Puiguillon pourroyt depuis sesd. acquisitions avoir alliené jusques à la somme de mil escuz seullement jusques à laquelle somme lad. Dame de Martigues ne sera tenue de garantie et où il se trouveroit que led. feu Sr. de Puiguillon en eust allienné pour plus grande somme que lesd. mil escuz icelle Dame de Martigues sera tenue, comme promectent lesd. Le Prevost et Debruc ses procureurs, rendre et paier le surplus aud. Sr. achepteur à sa volunté et premiere requete lad. baronnie, terre et seigneurie de La Fons-Sainct-Mageran tenue et mouvant en fief⁵² des duc de Bourbonnoys et d'Auvergne et de l'abbé de Sainc-Gilbert sans nulle charge, reservé⁵³ de quatre septiers de bled mesure dud. St.-Porsain, qui sont deubz à aucuns Srs. qui sont directz pour aucuns desd. heritaiges qui sont roturiers, et environ dix ou douze solz d'argent pour toutes et sans autres charges quelzconques et franches et quictes des avoirs d'icelles jusques à huy⁵⁴. Et lad. terre et seigneurie de Thiroiseau tenue et mouvant de lad. baronnie de La Fons pour le chef principal de lad. seigneurie de Thiroiseau. Pour d'icelle baronnie, terre et seigneurie de La Fondz-Sainct-Mageran et de Thiroiseau, leurs apartenances et dependances et des autres choses cy-dessus vendues, ensemble de toutes auctoritez, preeminances, prerogatives, nominations, collations et honneurs, tant ès eglises, chappelles, offrandes, sepultures, ceintures⁵⁵, bancs⁵⁶, sierges, que de toutes autres de quelque sorte, nature ou qualité qu'elles soient, combien qu'elles ne soient cy-exprimés, joyr et user par led. Sr. achepteur sesd. hoirs et ayant cause, tout ainsy qu'en joissoyt led. Sr. de Puiguillon de son vivant jusques à son decès, et en ordonner faire et disposer à tousjours à sa volunté comme de sa propre chose, vray et loyal acquest estant par cesd. presentes mis et subrogé irrevocablement au lieu et droictz de lad. Dame de Martigues. Et appartiendront et demoureront au proffict dud. Sr. achepteur tous et chacuns les meubles estans esd. seigneuries, chastel et maisons, ensemble tout le bestial⁵⁷ estant de present ès mestairies desd. terres apartenant à lad. Dame et qui a esté achepté par led. feu Sr. de Puiguillon ou par elle, non conprins la part des fermiers si aucuns sont y ont. Ensemble la cueillette des fruictz de ceste presente annee en toutes les choses vendues sans y comprandre les fruictz et levees⁵⁸ des annees preceddantes ceste vente, cession et transport faictz aux charges susd. et des autres foncieres et anciennes portees par les contractz desd. acquisitions particullieres seullement. Et oultre, moyennant la somme de dix-sept mil cinq cens escuz d'or sol francz deniers à lad. Dame venderesse que lesd. Le Prevost et de Bruc esd. noms de procureurs d'icelle Dame de Martigues, ont confessé et confessent avoir eu et receu d'icelluy Sr. achepteur et de ses deniers et qui payez, comptez et nombrez luy ont esté par led. de Jaccomini oud. nom, assavoir IIII^M V^C [écus] sol en lad. espece francz d'argent VI^M [écus] quartz d'escuz, V^M Lz⁵⁹ V^M [écus], et en testons : II^M [écus]. Le tout bon et ayant à present cours en la presence des notaires soubzsignez, dont ilz se tiennent pour contant et en ont quicté et quictent lesd. Sr. achepteur Jaccomini et promectent acquicter et garantir envers lad. Dame de Martigues et tous autres. Et parta[nt]⁶⁰ et moyennant ce que dessus lesd. Le Prevost et de Bruc oud. nom ont ceddé et transporté par cesd. presentes aud. achepteur tous et chacuns les droictz de proprieté, fondz, seigneurie, possession, noms, raison et actions soient rescindant ou rescizoires⁶¹, droict de retenue pour les heritaiges qui se trouveront avoir cy-devant esté alliennez, arrerages de cens, rentes, proffictz feodaulx⁶², amendes. Ensemble les saisins⁶³, seigneurie, possessions, noms, raisons et actions preeminances, prerogatives, franchises, libertez et autres droictz quelzconcques que lad. Dame de Martigues oud. nom pourroyt avoir et pretendre et demander et qui luy pourroient deuement⁶⁴ comporter et appartenir lors et pour l'advenir en et sur lesd. baronnie, terres et seigneuries, appartenances et deppendances et choses cy-dessus vendues, ceddees, et transportees. Et s'en est sont dessaisyz,desmis et devestuz du tout ès mains desd. notaires connus de notre cour souveraine⁶⁵ pour le roy nostred. Sr. pour ou nom et au proffict dud. Sr. d'Amberieu achepteur et de sesd. hoirs et ayans cause voullans, consentans et expressement accordans esd. noms qu'il en soyt et demeure du tout saisy, vestu, mis et receu en bonne et suffisante saisine, possession et infeodation par les Srs. ou Dames, celuy ou ceste qu'il appartiendra, et d'habondant pour ce faire, voulloir, consentir et accorder deuement estre sesd. iceulx vendeurs esd. noms ont fet et enstitué⁶⁶ leurs procureurs generaulx speciaulx et irrevocables les porteur ou porteurs de cesd. presentes ausquelz et chacun d'eulx ilz ont donné et donnent pouvoir et puissance de ce faire et tout ce que au cas appartiendra et sera necessaire. Et oultre, lesd. vendeurs esd. noms ont presentement fourny et delivré aud. Jaccominy oud. nom les lectres d'acquisitions dessus dactees et mentionnees, faictes desd. terres et seigneuries de La Fons et Thiroiseau desd. de Bayart et Ballore, avec les autres lectres et tiltres desd. acquisitions et decret fet par led. feu Sr. de Puiguillon desd. barronnie, terres et seigneuries et autres heritaiges et droictz susd. Ensemble le pappier terrier⁶⁷ de Thiroiseau et ung recepissé de Roger Boucher, receveur de lad. baronnie de La Fons, par lequel il confesse avoir le terrier de lad. baronnie, receptions de foy et autres lectres, tiltres, pappiers, documens et enseignemens que lad. Dame a et peult avoir servans de tiltres faisans mention d'icelle baronnie, terres et seigneuries, droictz et choses en deppendans. Et ung extraict ou coppie par collation pareillement signee desd. notaires du partaige faict avec ses coheritiers dud. feu Sr. de Puiguillon, le tout selon l'inventaire qui en a esté fet et signé des notaires soubzsignez, desquelles lectres et tiltres led. Sr. achepteur sera tenu aider à lad. Dame si pour sûr la voulloit cy-après de garantye. Et est assavoir que en faisant et passant le present contract il a esté convenu et accordé que lesd. baronnie, terres et seigneuries, heritaiges et choses cy-dessus vendues seront saisiz, criez et adjugez par decret soubz le nom dud. achepteur ou autre qu'il advisera aultre que de lad. Dame venderesse aux despens dud. achepteur dedans dix moys, affin de purger tous ypothecques sy aucuns y a. Et sy ausd. criees il intervenoit opposans aucuns opposans, soyt affin de distraire, adnuller lesd. criees ou aultrement, et en ce cas lad. Dame sera tenue les appaiser et faire cesser incontinant, à peyne de tous despens, dommages et interestz, pourveu que les opposans oppositions ne soient du faict dud. Sr. achepteur. Lesquelles baronnies, terres et seigneuries et heritaiges et droictz ledict achepteur sera tenu encherir par-dessus tous autres, tellement qu'il en demeurât adjudicateur. Et à quelque pris que se monte lad. adjudication, n'en sera plus ny moings payé que lad. somme de XVII^M V^C [escuz] cy-dessus payee par led. Sr. achepteur. A laquelle garandye susd. lesd. Le Prevost et de Bruc esd. noms ont speciallement obligé et ypothecqué, obligent et ypothequent par ces presentes la terre et seigneurie de Riés size en Poictou. Ensemble celle de Couetmen, de secheries et de Cornouaille et la terre de Cloz-Regnault⁶⁸ et quelques rentes assizes en Bourbonnoys à lad. Dame apartenant de son propre, et generallement toutes et chacunes ses autres terres, seigneuries, heritaiges et biens sans [?]⁶⁹ que l'obligation specialle desroge à la generalle ny au contraire. Et pour sur ce que dessus et les deppendances estre convenue et appellee par lad. Dame de Martigues si mestier⁷⁰ est, elle a esleu et eslist son dommicille irrevocable en l'hostel dud. M^e Claude Le Prevost assis à Paris rue Berthin Poré⁷¹, auquel lieu elle veult, consent et accorde que tous exploictz⁷², sommations⁷³, signiffications⁷⁴ et autres actes de justice qui y seront faictz pour raison de ce que dessus et les deppendances soient d'autel⁷⁵ effect force et vertu, somme⁷⁶ si faictz estoient à sa personne. A ce faire vindrent et furent presens noble homme Guillaume Fournier, Sr. du Roussay, Grand M^e des eaus et forestz de France⁷⁷ demeurant à Paris au Chlr. du guet⁷⁸, et led. Sr. M^e Claude Le Prevost cy-dessus nommé, lesquelz de leurs bons grez et bonnes voluntez se sont constituez et constituent respondans et principaulx garandz chacun d'eux seul et pour le tout sans division, renonceans au benefice de division et ordre de discution pour les choses cy-dessus vendues et transportees. Et en ont faict leur propre faict et debte et ce jusques à la concurance desd. XVII^M V^C [écus] sol, et des despens, dommages et interestz. Et tiendra lad. responce et obligation des dessusd. Fournier et Le Prevost, jusques à ce que led. decret soyt fet et parfaict, levé et executé seullement. Lequel decret et adjudication led. achepteur a promis et sera tenu mectre, afin dedans dix moys à compter du jour et dacte de ces presentes s'il n'y a empeschement du faict de lad. Dame. Et au cas qu'il y eust empeschement, aud. decret du faict de lad. Dame qui ne peust estre sitost vuidé, et que lesd. respondans voulussent estre deschargez en baillant par lad. Dame bonne et suffisante caution en ceste ville de Paris qui s'oblige comme dessus lesd. respondans deuement [mot biffé] quictes et deschargez de lad. promesse et responce. Car ainsy toutes les choses susd. ont esté par exprès convenues et accordees entre lesd. parties esd. noms en faisant et passant ces presentes qui autrement n'eussent esté faictes, passees, ny accordees. Lesquelles presentes et tout le contenu en icelle lesd. Srs. Prevost respondant et led. de Vieillecourt et chacun d'eulx en leurs propres noms ont promis, seront tenuz et promectent faire ratiffier et avoir pour agreable par lad. Dame de Martigues, et en bailler lettres en bonne et vallable forme passee soubz scel royal ou autenticque aud. achepteur en ceste ville de Paris dedans trois moys aussy prochains venans en l'hostel de noble personne M^e Honofre Mellin assis à Paris rue du Batouer⁷⁹, auquel lieu led. Sr. Jaccominy oud. nom a esleu [et élit ?]⁸⁰ son domicille pour l'execution des presentes et les deppendances. Promectans lesd. vendeurs et ses noms et respondan[ts]⁸¹ avoir pour bien agreable ferme et stable à tousjours cesd. presentes et tout le contenu en icelles, sans jamais y contrevenir en quelque sorte et maniere que ce soyt sur peyne de rendre, restituer et paier à pur à plain⁸² et sans aucun plaid ou procès tous coustz, fraiz, mises, despens, dommages et interestz qui faictz eux souffertz, soustenuz et encouruz seroient par deffault desd. garantie et des autres choses dessusd. ou d'aulcuns d'icelles par eulx non deuement faictes, tenues, entretenues et non deuement accomplies ainsy et par la forme et maniere que dessus est dict et en icelles pourchassans et requerans soubz l'obligation et ypothecque de tous et chacuns leurs biens et ceulx de leurs hoirs, meubles et immeubles presens et advenir qu'ilz, esd. noms lesd. respondants chacun pour le tout sans division, en ont pour ce du tout soubzmis et soubzmectent à la justice jurisdiction et contraincte de lad. prevosté de Paris et de toutes autres justic[es]⁸³ et jurisdictions où trouvez seront pour tout le contenu cy-dessus en cesd. presentes entretenir et accomplir. Et renoncerent en ce faisant express[ement]⁸⁴ iceulx vendeurs esd. noms et respondans à toutes exceptions de deception⁸⁵, dolz, frauldes, baratz⁸⁶, cautelles⁸⁷, cavillations⁸⁸, noms, raisons, dispensations, et absolutions donnees et à donner à tout droict escript et non escript, canon et civil, à toutes lectres d'estat de grace, respictz⁸⁹, reliefz⁹⁰ et à toutes autres choses et aides generallement quelz concques qui tant de fet comme de droict l'on vouldroict dire, proposer ou alleguer pour empescher l'effect, teneue et execution d'icelles et. Mesmes iceulx respondans esd. noms aud. benefice de division et ordre de discution et au droict desd. generalle renoncement [?], non-valloir. Ensuictent las teneurs desd. lettres de procuration dont cy-dessus est fet mention. A tous ceulx qui ces presentes lettres verront sçavoir faisons que par devant nous, Estienne Boislené et René du Moley⁹¹, notaires et tabellions royaulx⁹² soubzsignez de la court et jurisdiction de Nantes du nombre des XLVI y establiz et receuz, fut presente en sa personne très haulte et puissante princesse Marie de Beauquere, Dame de Martigues, duchesse douairiere de Pentevre, contesse de Plorhan⁹³, baronne des Essars⁹⁴, La Fons-St.-Mageran, Couetmen, Ryé et L'Obelonniere⁹⁵ demourante pour le present en ceste ville de Nantes, laquelle apr[és] s'estre de sa personne et biens soubzmise à la jurisdiction et obeyssance de notred. court a faict, nommé, constitué et estably et par ces presentes faict, nomme et establit ses procureurs generaulx et speciaulx nobles personnes M^es Claude Le Prevost seigneur d'Andilly, refferendaire en la chancellerie de France et advocat en la court de Parlement de Paris et Guillaume de Bruc, escuyer, Sr. de la Vieillecourt, conseiller du roy au siege presidial de Nantes et secretaire de lad. Dame, ausquelz et chacun lad. Dame instituante a donné et donne par cesd. presentes plain povoir, puissance et auctorité specialle pour, et en son nom si besoing est, plaidder, eslire domicille et substituer au fet de plaiddoirie scivillement [?] et par especial, de vendre, cedder, quicter et transporter à tousjours au nom de lad. Dame, garantir, delivrer et deffendre de tous troubles et empeschements quelz concques à Pierre Anthoine Jaccomini, gentilhomme florentin demourant à Paris ou autres qui seront par luy nommez et à leur proffict ou de l'un d'eulx ainsy que bon semblera aud. de Jaccomini ou à celuy ou ceulx qu'il nommera, lad. baronnie, terre et seigneurie de La Font-St.-Mageran assize et scituee aux pais et duchez de Bourbonnois et d'Auvergne avec ses apartenances et deppendances à plain speciffiees et declarees par le menu au contract d'acquisition d'icelle baronnie, faict par le feu Sr. de Puiguillon, pere de lad. Dame, de Jehan de Bayart, escuyer, le VIII^e jour d'avril mil V^C soixante douze. Item la terre et seigneurie de Thiroiseau avec toutes ses appartenances et deppendances aussy acquise assize aud. pays et duché de Bourbonnois, et pareillement acquise par led. feu Sr. de Puiguillon de Claude de Balore, Sr. dud. lieu et de Molinneuf le XXV^e jour de fevrier mil V^C LXX VIII. Item, le droict et faculté de remeré par led. Sr. de Puiguillon acquis le XIX^e jour de juliet oud. an mil V^C LXXII dud. de Bayart qui s'estoyt reservé povoir recouvrer la vigne de Margaza près Briailles contenant VIII ouvrees de vignes pour le pris de cent escuz sol. Item, ung pré scitué en la paroisse de St.-Didier au terrouér de La-Forest acquis par led. feu Sr. de Puiguillon de Gilbert Olivier le XIX^e jour de novembre mil V^C LXXIIII pour la somme de XXVIII^₶. Item, ung bois taillis appellé Le Bois-Teillis, acquis par led. Sr. de Puiguill[on] le IX^e jour de janvier mil V^C LXXV de Philippes de Treilles, Sr. de Jaulnay et de Loyse de Brezolles sa femme pour la somme [de]⁹⁶ III^C Lz. Item, une piece de terre assize aud. terrouér de La Fons contenant IIII septrees ou environ acquise par led. feu Sr. de Puiguillon de Loys d'Acques le XIIII^e jour de may mil V^C LXXVIII pour la somme de XXI [écus] II tz. Item, une myne de froment mesure de St-Porsain, cens portans directe seigneurie payable sur les choses rapportees au contract aussy acquis par led. feu Sr. de Puiguillon dud. Philippes de Treilles, Sr. de Jaulnay, le XXII^e jour de janvier mil V^C LXXIX pour la somme de XXV Lz. Item, ung pré assis en la parroisse de St.-Didier au terrouér de Chambont par icelluy feu Sr. de Puiguillon acquis dud. Sr. de Jaulnay et sa femme le XVI^e jour d'avril oud. an mil V^C LXXIX pour la somme de LIII [écus] I tz. Item, une piece de terre scituee au terrouér de la Coste Saint-Pons avec ung petit pré tenant ensemble, le tout contenant VIII septrees de terre par icelluy feu Sr. de Pui Puiguillon acquis de Gilbert Gabriel et Claude Fauchere le XIIII^e julliet oub oud. an [mil] V^C LXXIX pour la somme de XXII [écus] sol. Item, certaines pieces de terre, l'une contenant dix quartonnees, l'autre six, l'autre pareillement six, et la IIII^e une septeree, par icelluy feu Sr. de Puiguillon acquises de Messire Jehan Lesnat presbtre, de III [écus] I tz. le VIII^e jour de janvier mil V^C III^XX. Item, ung pré appelé le pré de Reveillon [par icelluy feu Sr. de Puiguillon]⁹⁷ acquis de Patrocle Courgiat le XXI^e jour de novembre oud. an. Item, plusieurs rentes cens qui estoient deubz aux abbé de St.-Gilbert et prieur dud. St. Poursain, par icelluy feu Sr. de Puiguillon acquis comme plus au long le contiennnent les lettres de lad. acquisition. Et generallement de vendre et transporter comme dessus toutes autres choses quelz concques estans des apartenances desd. baronnie, terres et seigneuries de La Font-St.-Mageran et Thiroiseau, et telles qu'elles ont esté acquises par led. feu Sr. de Puiguillon sans aucune chose en excepter, retenir, ne reserver, par lad. Dame, encores qu'ilz ne soient cy speciffiez ne declarez par le menu. En ce touteffoys non comprins ce que que led. feu Sr. de Puiguillon pourroyt depuis lesd. acquisitions avoir allienné jusques à la somme de mil escuz sol seullement, jusques à laquelle somme lad. Dame ne sera tenue de garantie et eviction⁹⁸. Et où il se trouveroit que led. Sr. de Puiguillon en eust alliené pour plus grande somme que lesd. mil escuz, icelle Dame sera tenue rendre et paier le surplus à l'achepteur. Et d'aultant qu'il se trouveroyt que led. feu Sr. de Puiguillon en eust eschangé aucunes, l'acquereur joyra et se contentera de contreschang[es] qui tiennent pareil lieu que ce qui a esté baillé en eschange par led. feu Sr. de Puiguillon, plus de vendre tous les meubles estans ès maisons, chastelz et logis desd. terres et seigneuries apartenant à lad. Dame, avec le bestial des mestairies pour la part et portion qu'elle y est fondee, avec tous les fruictz de la presente annee, d'aultant aussy qu'il en apartient à lad. Dame, lad. baronnie, terre et seigneurie de La Font-Sainct-Mageran tenue et mouvant en chef des duché de Bourbonnois et d'Auvergne et de l'abbé de St.-Gilbert, sans nulle charge, reservée de quatre septrees de bled mesure dud. St.-Poursain, qui sont deubz à aucuns seigneurs directz pour aucuns desd. heritaiges qui sont roturiers, et environ X ou XII s. d'argent pour toutes et sans autres charges quelz concques. Et lad. terre et seigneurie de Thiroiseau tenue et mouvant de lad. baronnie de La Fondz pour le chef principal de lad. seigneurie de Thiroiseau. Et à lad. Dame jure et afferme ne sçavoir si le tout de lad. seigneurie de Theroiseau est tenu dud. La Fons pour en estre puis peu de temps Dame, lad. terre de Theroiseau chargee de la pension ou fondation ancienne à la curre de St.-Remy⁹⁹ sans autres charges quelz conques pour l'achep[teur en]¹⁰⁰ joyr, user, faire et disposer d'icelles choses et estre mis et s'abroge irrevocablement au lieu et droictz de lad. Dame. Ensemble de tous lesd. meubles estans esd. seigneuries, chastelz et maisons, avec de tout le bestial estant de present ès mestairies de lad. terre appartenant comme dict est à lad. Dame et qui a esté achepté par led. feu Sr. de Puiguillon son pere ou par elle. Ensemble la cueillette des fruictz de ceste presente annee telles qu'elles apartiennent aussy à lad. Dame en toutes lesd. choses vendues et faire et passer lad. vente pour le pris et somme de dix-sept mil cinq cens escuz sol venans clairs et nets à la main de lad. Dame sans qu'elle soyt tenue de paier aucunes ventes lodz, honneurs, quintz, requinctz¹⁰¹, rachaptz ne autres droictz seigneuriaulx, ou d'y contribuer si aucuns estoient deubz, ains sera tenu led. achepteur l'en descharger et garantir. Et par ce faisant transporter tous les droictz de proprieté soyent rescindans ou rescisoires, droict de retenue pour les heritaiges qui se trouveront avoir estez alliennez pour en faire les poursuittes et dilligences par led. acquereur à ses fraiz, perilz et fortunes, sans que lad. Dame soyt tenue à aucune garantie pour ce regard. Ensemble les saisines, seigneuries, possessions, noms, raisons, actions, preeminances, prerogatives, franchises, libertez, et autres droictz quelz concques que lad. Dame oud. nom pourroit pretendre et demander, et qui luy pourroient deuement apartenir ores¹⁰² et pour et pour le temps advenir ès choses cy-dessus et s'en dessaisir, desmectre et devestir du tout ès mains des notaires qui passeront led. contract au proffict dud. achepteur, ses hoirs et ayans cause, et icelluy acquereur mis et receu èz bonne et suffisante saisine, possession et infeodation. Et à icelle fin instituer et desputer au nom de lad. Dame telz pars qu'il apartiendra, avec promesse et obligation de deffendre et garantir, comme dict est, fournir ung pleige¹⁰³ ou co-vendeur qui s'obligera ung seul et pour le tout et sans division avec les renons [?] en tel cas requises de la garante et eviction desd. choses, et si besoing est consentir que la vente et adjudication par decret en soyt faicte par saisies, criees, subhastarnement [?]¹⁰⁴ qui seront fetes sur ledict achepteur. Et lequel sera tenu de les faire vuider et adjuger ledict decret à ses fraiz, poursuittes et dilligences dedans sept mois à compter du jour de la cellebration dud. contract, et de les faire mectre à pris et si hault qu'elles luy demeurent comme plus offrant, et donner encherissement, à la charge touteffois que, à quelque pris que se monte lad. vente judiciaire, led. achepteur ne sera tenu paier que lad. somme de XVII^M V^C [écus] sol luy delivrer par inventaire les contractz d'acquisitions qui en ont esté fetes par led. feu Sr. de Puiguillon avec la coppie du contract de partaige par lequel elles sont demourees à lad. Dame avec autres lettres, tiltres et ensegnemens desd. terres, à la charge aud. achepteur de les rendre et remectre entre mains d'icelle Dame s'il la voulloyt appeler en garance¹⁰⁵. Ensemble faire delivrance des meubles estans ès chastelz et hostelz desd. terres et seigneuries et du bestail des mestairies pour la part et portion qu'il en apartient à lad. Dame donner charge et mandement aux receveurs de rendre compte aud. achepteur des fruictz de la presente annee et luy en paier le reliqua. Et aux colons¹⁰⁶, mestayers, fermiers, subjectz et vassaulx de luy paier les rentes, cens et autres droictz seigneuriaulx qu'ilz peuvent debvoir de lad. presente annee et doresnavant à l'advenir et les en descharger en payant audict achepteur. Promect lad. Dame ratiffier et avoir agreable lors quant requise en sera, tout ce qui sera faict et negocié environ ce par sesd. procureurs et chacun d'eulx, et pour cest effect choisir et eslire domicille en tel lieu que sesd. procureurs verront bon estre. Et generallement de faire et negocier environ ce et [sic] qui en deppend toutes et chacunes les choses requises et necessaires que lad. Dame instituante feroit et presente y estoyt, combien que l'affaire requiere povoir plus special ou presence de personne, promectant lad. Dame comme dessus par sa foy et serment soubz l'obligation et ypothecque de tous et chacuns ses biens presens et futurs, qu'elle aura pour agreable ferme et stable à tousjours tout ce que par sesd. procureurs et chacun sera fet et negocié. Parquoy de son consentement et requete, ce y covenons à ce faire et tenir tesmoing le seel¹⁰⁷ royal de lad. court apposé à cesd. presentes qui passees et consenties ont esté en la ville dud. Nantes au logis de la Dame de la Papotiere¹⁰⁸ le VII^e jour de juliet mil V^C IIII^XX II en l'heure de huict heures du matin. Signé Marie de Beauquere, Boilesné VIII^e notaire royal, Dumolez notaire royal, et scellé en placcart de cire vert. Faict et passé double en l'hostel du Sr. Jeherosme de Gondy¹⁰⁹, chevalier de l'ordre du roy, gentilhomme ordinaire de sa chambre, sis à St.-Germain-des-Prez lez Paris rue Neufve dud. lieu, l'an mil V^C quatre-vingtz deux le samedy vingt-ung^me jour de julliet avant midy. Ilz ont signé le registre des presentes et a esté declaré le [?] edict [?] du controlle des tiltres.

([en marge gauche sur deux lignes ] : Pour coppie aud. Sr. / Le Prevost oud. nom)

Signé : Boreau [biffure] Denetz¹¹⁰.

[signatures] Boreau [et plus loin] Denetz.

[D'une encre différente, écriture identique] Le dict Guillaume de Bruc, escuyer, seigneur de la Vieille- Court cy-dessus nommé ou nom et comme procureur de lad. Dame de Martigues et en vertu de la procuration cy-dessus transcripte a promect promis, promect et gaige acquicter, garandir et rendre indempné¹¹¹ lesd. Srs. du [biffure] Roussay et Le Prevost à ce presens et acceptans de la promesse et responce qu'ilz ont faicte ung seul et le tout des choses cy-dessus transcriptes pour lad. Dame de Martigues envers led. Sr. de Jaccomini oud. nom et les faire descharger dedans lesd. dix moys si lad. Dame en est requise, et fournir d'aultre nouvelle caution ainsy qu'il est dict et porté par led. contract .Et à faulte de ce, faire leur payer tous despens, dommages et interestz esquelz ilz seroient encouruz et pourroient encourir à cause de lad. responce et caution par eulx fete. Et en oultre led. Sr. de Bruc en son propre et privé nom a promis, dans troys moys à compter de jour et date de ces presentes, apporter ou envoyer lettres de ratiffication de lad. Dame de Martigues de tout ce que dessus en bonne forme et autenticque passee par devant notaires ou tabellion et à faulte de ce faire dans led. temps payer en son nom tous deppens, dommaiges et interestz, promettant led. Sr. esd. noms renoncer. Fet et passé en l'hostel du Sr. Jherosme de Gondy assis à Saint-Germain-des-Prez lez Paris rue Neufve dud. lieu l'an mil V^C quatre-vingtz-deux le samedy vingt ung^me jour de juliet au matin doubl[e ?]¹¹². Ilz ont signé la mynutte des presentes. Signé : Boreau Denetz.

[signatures:] Boreau [plus loin] Denetz

⸎⸎⸎⸎⸎

Notes

Personnages cités

L'une des pages du manuscrit est absente du document numérique visible sur Gallica. Nous remercions M. Alexandre Tur, conservateur au département des Manuscrits de la Bibliothèque Nationale, de nous avoir communiqué l'image du feuillet manquant.