22 juillet 2023

Chronique (protestante) des années de guerre : Dieppe et le pays de Caux pendant la première guerre de Religion (1562-1563)

Le présent document est étonnament inédit. Il semble bien connu des historiens de Dieppe et de la Normandie du XVII^e au XIX^e siècle (voir bibliographie), mais, autant que nous puissions en juger, il n'a jamais été publié sous la forme que nous transcrivons. S'il paraît connu des historiens de Dieppe et de la Normandie, c'est sans doute en raison de sa grande ressemblance avec des passages de l'Histoire ecclesiastique des églises réformées au royaume de France de Théodore de Bèze¹ quand celui-ci parle de Dieppe pour la période de 1562-1563. Mais les deux textes, malgré de grandes ressemblances² et parfois l'emploi étonnant des mêmes expressions, comportent chacun des détails et des précisions qui ne sont pas dans l'autre texte.

Notre document est donc bien disctinct du récit de Théodore de Bèze, et il est plus complet sur la chronique dieppoise de ces années. C'est un témoignage d'une richesse de détails remarquable sur ce qui se passe à Dieppe et les environs pendant la première guerre de Religion, de 1562 à 1563. On en jugera aux intertitres que nous insérons en gras dans le texte pour une circulation plus aisée dans le texte : plusieurs passages méritent d'être mis en valeur, comme les attaques répétées et détaillées d'Arques-la-Bataille par les huguenots dieppois, leur expédition vers Cany-Barville et leur mise à sac de Veules-les-Roses, l'embuscade de Martin-Eglise, ou bien le dépit de Montgomery devant l'accueil que lui font les bourgeois de Dieppe en décembre 1562, rendu avec des paroles au style direct très vivantes.

Comme le comte de Montgomery, déjà présenté sur ce site³, de grands acteurs passent dans le texte : le roi Charles IX et la reine-mère Catherine de Médicis qui viennent à Dieppe en août 1563, Coligny et plusieurs officiers généraux des deux camps, mais aussi divers capitaines plus obscurs, voire de soldats, qui ne sont pas les moins actifs. L'évolution des mentalités, les sentiments de la population, des bourgeois, des marins, des marchands, mais aussi des réfugiés huguenots des provinces environnantes (Picardie notamment) transparaissent à de nombreuses reprises. On trouve par ailleurs des indications sur les pêches, le traffic maritime, les prix des denrées, etc.

En dehors de la forme de l'écriture, des indices donnent à penser qu'il est rédigé avant 1567 et la deuxième guerre de Religion, c'est-à-dire très près des événements racontés. On a d'abord le titre, qui considère les « troubles » comme n'ayant pas de suite une fois la paix faite, et l'on a également par exemple en fin du texte un jugement assez favorable sur René de Sigogne, alors que celui-ci change d'attitude envers les protestants très précisément à partir de 1567.

L'auteur de ce document, anonyme autant que nous ayons pu en juger⁴, est en effet clairement partisan. Il appartient au camp des huguenots dieppois modérés, essayant d'avoir un discours mesuré mais ne résistant pas à s'enflammer lors du récit de certains épisodes « guerriers » (« les nôtres »). Son point de vue est donc à considérer avec circonspection, mais il reste un témoignage infiniment précieux sur un épisode particulièrement mouvementé de l'histoire de Dieppe et de tout le pays de Caux.

⸎⸎⸎⸎⸎

Memoire sommaire des choses les plus notables advenues en la ville de Dieppe durant les troubles et guerres civilles advenues en ce royaulme.

Mars 1562. Dieppe se range dans le camp de Condé

Premierement, après que les habitans de lad.⁵ ville en la plus grande et meilleure partye faisans profession ouverte de la religion reformee, et qui depuys le edict de janvier⁶ avoient continué paisiblement les presches publicques et aultres exercices de leurd. religion dedans lad. ville suyvant la permission particuliere par eulx poursuyvie et à eulx octroyee par le roy et aulx aultres villes de frontiere⁷, eurent receu les nouvelles du piteuz et cruel massacre executé par le sieur de Guyse et ceulx de sa compaignye sur les fidelles de Wassy au mois de mars 1561⁸, et avoir entendu les preparatifz et entreprinses qui se machinoyent contre toutes les eglises de France comme l'effect l'a depuys demonstré, se sentans menassez par dessus tous les aultres par ce que dès le temps du roy Henry⁹ ilz avoient receu et entretenu les ministres portans la parolle de Dieu, et après avoir par quelques annees continué les assemblees secrettes, s'estoient les premiers de ce pays enhardyz de la faire prescher publicquement sans crainte des menaces et dangiers eminentz dont Dieu les avoit tousjours preservez, après aussy avoir oy¹⁰ monsieur Virel¹¹, ministre de l'eglise de Paris et ung gentilhomme de monsieur le prince de Condé¹² envoyez de sa part aux eglises de Normandye pour faire trouver en dilligence le plus grand nombre de gentilzhommes qu'il seroit possible pour l'accompaigner, lesquelz Virel et gentilhomme vindrent à Dieppe le xxii^e dud. mois de mars¹³, se delibererent de faire guet et porte pour la garde de la ville et de prendre les armes soubz l'auctorité de mond. sieur le prince de Condé que Dieu sembloit avoir suscité en ce temps pour liberateur de son eglise, protecteur du roy et de sa couronne et conservateur de ses edictz, et se joindre et associer à sa ligue saincte¹⁴ et luy donner ayde de toute leur puyssance en une si juste guerre.

Avril 1562. Dieppe fournit de l'argent au camp protestant et lève des troupes

Et de faict au moys d'avril ensuyvant leverent sur eulx cinq mil livres qu'ilz envoyerent à ceulx de l'eglise de Rouen pour avec les deniers par eulx fournyz les faire tenir aud. prince en la ville d'Orleans¹⁵. Et si¹⁶ fournirent argent et armes à plusieurs gentilzhommes de ce pays qui se delibererent d'aller se joindre avec led. prince. Davantage firent lever et dresser par le cappitaine Valfenieres¹⁷ une compaignye de deux cens hommes de pied des enffans de lad. ville, la pluspart fort bien equippez et deliberez en intention de les envoyer à Orleans pour le secours dud. prince, pensans que la guerre civille de nouveau commancee deust ilec¹⁸ prendre fin sans que le mal s'espandist si loing qu'il a faict.

19-20 avril 1562. Iconoclasme dans les églises de Dieppe

La nuyct ensuyvant le dymanche dix neufiesme d'avril 1562 les ymages¹⁹ des deux temples²⁰ de lad. ville furent tous abbatuz, bruslez et reduictz en cendre et les aultelz rompuz et renversez par les mariniers et aultres du commung peuple de lad. ville comme divinement poulsez sans resistance d'aulcun et sans qu'il en advinst aulcun trouble ou sedition en ladite ville. Et avec ce furent bruslez plusieurs ornementz, chappes, chazubles et bannieres de grande et riche valeur.

Avril 1562. Expédition des protestants dieppois à Ouville-la-Rivière pour défendre Luneray. Iconoclasme à Ouville, au Pollet et à Neuville-lès-Dieppe

Le bruict d'un cas tant nouveau fut incontinant espandu partout et lequel print accroissement par ce que le xi^e dud. moys ceulx de lad. ville aians eu advertissement que la damoiselle d'Ouville²¹ de la maison de Vieupont avoit receu en sa maison ses freres²² gentilzhommes bien accompaignez en intention de grever²³ et offencer les fidelles de l'eglise de Luneray²⁴ prochaine dud. lieu, sortirent jusques au nombre de soixante chevaulx ou environ avec quelques gens de pied et allerent jusques aud. lieu d'Ouville.

Et aians trouvé que lad. damoiselle et sesd. freres s'estoient retirez ne firent aulcun mal à lad. maison tant seullement prindrent et admenerent deux pieces d'artillerye trouvees en lad. maison que lad. damoiselle avoit faict admener du port de Saane²⁵ où elles avoient esté autrefoys mises pour la deffense de la coste et abbatirent les ymages du moustier²⁶ dud. lieu d'Ouville et d'aultres moustiers par où ilz passerent. Et à leur retour en firent aultant à la chappelle des Greves²⁷ estant au Pollet et au moustier de Neufville sur Dieppe²⁸.

Mai 1562. Visite à Dieppe du duc de Bouillon, gouverneur de Normandie

Peu de temps après, en l'assemblee des manans²⁹ et habitans de la ville en l'hostel commung d'icelle, sur l'advertissement qu'ilz avoient eu que monsieur le duc de Bouillon³⁰, gouverneur et lieutenant general pour le roy en ses pays et duché de Normandye, s'estoit achemyné pour venir en lad. ville et y poser pour cappitaine et gouverneur le seigneur de Richarville³¹ fut deliberé et conclud que led. sieur duc de Bouillon seroit honnorablement receu selon que sa grandeur et le lieu qu'il tient le meritoit. Et luy seroit faict requeste de la part desd. manans et habitans que durant le temps des troubles qui commançoient à s'eslever en ce royaulme ne leur fust baillé aultre cappitaine et gouverneur que le sieur de Fors³², pouveu par le roy à cest effect soubz l'auctorité de mond. sieur l'Admiral³³ cappitaine en chef de lad. ville et chateau d'icelle, consideré qu'il n'avoit faict faulte pour le deposer, qu'il estoit chevalier et gentilhomme d'honneur et de bonne maison possedant grandz biens et revenu et eschanzon³⁴ ordinaire de la maison du roy, et auquel lesd. habitans avoient fience comme ayans congneu et experimenté sa vertu, loyaulté, integrité, sçavoir et experience.

Le quatriesme de may³⁵, led. seigneur duc de Bouillon arriva en lad. ville, au devant duquel sortyt à cheval led. sieur de Fors accompaigné d'un bon nombre des officiers, conseilliers et notables bourgeois de lad. ville pour le recepvoir en tout honneur et reverence. Et furent envoyez par devers luy jusques au lieu de sa repue³⁶ deux bourgeois de lad. ville pour luy supplier qu'il n'admenast avec luy led. sieur de Ricarville pour le dangier qui en pourroit advenir, et qu'il ne seroit en la puissance des gens de bien d'icelle ville d'empescher l'emotion³⁷ du peuple contre led. sieur de Ricarville tenant le party de la maison de Guyse, mesmes pour admonnester icelluy sieur de Ricarville de ne se mectre en tel inconvenient. A laquelle supplication led. sieur de Bouillon inclina voluntiers, et par son conseil se deporta led. sieur de Ricarville de passer plus oultre.

Atant³⁸ s'en vint à Dieppe led. sieur de Bouillon bien accompaigné de gentilzhommes lequel fut rencontré, salué et receu en tout honneur et reverence par led. sieur de Fors et sa compaignye. Et approchant près de la porte de lad. ville sortirent le cappitaine Rouverey³⁹ et le cappitaine Valfinieres qui luy feirent la reverence le genoil à terre. Et entrant en lad. ville passa entre deux rangs de harquebuziers de lad. ville, commanceant dès lad. porte et continuant jusques au chasteau, lesquelz estans jusques au nombre de sept à huict cens, tous d'une voix en lieu de saluer de leurs harquebuzes et en signe de joye de la venue dud. sieur de Bouillon commancerent à chanter psalmes⁴⁰ jusques à ce que led. sieur de Bouillon fut arrivé et descendu aud. chasteau où il print son logis, lequel fut tout estonné de veoir si grande compaignie en armes⁴¹.

Le mesme jour⁴² les officiers, conseilliers et principaulx bourgeois de lad. ville allerent faire la reverence aud. sieur de Bouillon et parlans par led. procureur et scindicq⁴³ luy remonstrerent et protesterent devant Dieu et les hommes qu'ilz n'avoient esté, n'estoient et ne seroient jamais en autre volonté que de vivre et mourir soubz l'obeissance du roy comme leur prince naturel et souverain seigneur en suyvans en cela les traces de leurs predecesseurs, la fidelité et loyaulté desquelz enves la Couronne de France avoit esté tousjours congneue et experimenté⁴⁴, se tenans assurez que la majesté du roy ne leur vouldroit commander chose qui peust forcer leurs consciences, disans que ce qu'ilz avoient renforcé la garde ordinaire du guet et portes de la ville n'estoit pour attempter aulcune chose contre son auctorité, mais pour se donner garde de tous aguetz⁴⁵ et surprinses et la conserver et garder en l'obeissance de Sa Majesté durant sa minorité⁴⁶ contre la tirannye de ceulx qui, soubz pretexte de religion vouloient pescher en eaue trouble et mectre le royaulme en dangier.

Et quant au faict des ymages abbatues, disoient qu'ilz ne vouloient excuser, et encores moings approuver l'insolence et temerité de ceulx qui avoient commis ce desordre, mais que cela s'estoit faict si soudainement et en moings de deux heures de nuyct par gens incongneuz, qu'il n'avoit esté possible d'y remedier, voire et nonobstant les deffenses faictes au precedent⁴⁷ par l'auctorité du magistrat⁴⁸ et les remonstrances dont le ministre⁴⁹ avoit usé en ses presches publicques pour exhorter ung chacun de n'attempter ung tel faict, louans toutesfois Dieu de ce que par sa providence le cas s'estoit tellement porté qu'il n'en estoit advenu aulcune sedition, effuzion d'une seulle goutte de sang, batterye ne murmure d'homme du monde.

Si supplierent aud. sieur de Bouillon leur vouloir servir de deffense contre les rapportz odieux qu'on pourroit avoir faictz pour les defavorizer envers leur prince, luy qui pour avoir conversé avec eulx et leur avoir commandé continuellement l'espace de demy an durant la guerre derniere des Angloix⁵⁰, estoit pour tesmoingner leur affection, reverence et naturelle obeissance qu'ilz portoient à la majesté du roy et à ses lieutenans et preposez, luy supplians aussy de leur vouloir laisser pour gouverneur led. sieur de Fors.

Ledit sieur de Bouillon, selon sa naturelle bonté, humanité et faveur accoustumee qu'il a tousjours monstree envers lesd. habitans, leur usa de doulce et gratieuse response. Et après leur avoir loué les graces et vertus que Dieu avoit mises au roy, les exhorta de demeurer en son obeissance, principallement durant sa minorité, et qu'estant parvenu en aage il sçauroit bien remarquer et congnoistre ceulx qui se seroient monstrez envers luy bons et loyaulx serviteurs et subjectz, disant ausd. habitans qu'ilz eussent à luy bailler par escript leurs excuses de ce qui s'estoit faict en lad. ville, et qu'il les feroit entendre au roy, envers lequel il leur serviroit d'escu⁵¹ et deffense contre les calumniateurs et malveillans comme il avoit tousjours faict, accordant ausd. habitans leur requeste de leur laisser led. sieur de Fors pour gouverneur.

Le landemain cinquiesme de may⁵² led. seigneur de Bouillon trouvant maulvais par la persuasion d'aulcuns⁵³ gentilzhommes estans autour de sa personne que durant la nuyct precedente on avoit mis vingt cinq hommes en garde aud. chasteau, combien que led. sieur de Fors s'esforceast de luy oster la maulvaise oppinion qu'il en avoit conceue, disant que c'estoit la garde ordinaire que lesd. habitans faisoient aud. chasteau, partit de ladite ville et s'en alla à Arques⁵⁴, là où il permist au cappitaine et habitans dud. lieu de prendre trente hommes soldoyez⁵⁵ des deniers de la recepte ordinaire du roy pour la garde du chasteau dud. lieu pour le doubte qu'ilz disoient avoir de ceulx de la ville de Dieppe.

Le sixiesme du moys⁵⁶ fut faicte assemblee des manans et habitans de ladite ville pour leur faire entendre le mandement decerné par led. sieur de Bouillon par lequel il estoit enjoinct et commandé ausd. habitans, tant d'une religion que d'aultre, faire guet et porte et faire vuyder tous estrangiers hors de lad. ville et faire publier par les carefours que les bourgeois de lad. ville qui s'estoient absentez eussent à retourner et rentrer en leurs maisons en assurance, sur peyne d'estre privez de leurs privileges, lequel mandement fut le mesme jour publié.

Mai 1562. Les protestants dieppois envoient des troupes dans Rouen menacé de siège et affectent l'église Saint-Jacques au culte réformé

Le dixiesme dud. moys⁵⁷ fut mis en deliberation au conseil de lad. ville la requeste faicte par les habitans de Rouen de leur donner secours et ayde pour resister à l'entreprinse de monsieur le duc d'Aumalle⁵⁸ qui s'estoit achemyné avec son armee pour venir mectre le siege devant lad. ville de Rouen.

Surquoy après avoir entendu la volunté mesmement de mond. sieur de Bouillon estant pour lors à Rouen par luy declaree à deux bourgeois de la ville de Dieppe qu'il avoit mandez à ceste fin, fut conclud qu'il leur seroit envoyé deux cens hommes de pied soubz la conduicte dud. sieur de Rouverey qui estoit la compagnie levee par le cappitaine Valfenieres en intention de l'envoyer à Orleans⁵⁹ comme il a esté dict. Et fut donné charge aud. cappitaine Valfenieres de faire et dresser⁶⁰ une autre compagnie de gens de pied, laquelle il feit et composa tant de soldatz des vielles [sic] bandes estans à Calais⁶¹ qu'il manda et fit venir en lad. ville, que d'aultres les plus vaillans homme qu'il peust trouver.

Le seizeiesme dud. moys⁶², veille de la Penthecoste, ceulx de l'eglise reformee prindrent le temple de Saint Jaques⁶³ et commancerent à y faire les presches et aultres exercices de leur religion.

Mai 1562. Premières attaques des protestants dieppois contre Arques-la-Bataille et son église. Echec de la tentative d'accord de bon voisinage entre Dieppe et Arques

Environ ce temps ceulx d'Arques commancerent à fortiffier et remparer leur temple⁶⁴ par dedans et y mectre garde de gens armez avec des broches⁶⁵ et harquebuzes à crocq⁶⁶, craignans que ceulx de Dieppe n'y allassent pour abbattre les ymages et se deffians mesmes de ceulx de l'eglise dud. lieu d'Arques⁶⁷, lequelz ilz commancerent à affliger et piller leurs biens, de sorte qu'ilz furent contrainctz se retirer à refuge dedans lad. ville de Dieppe avec ce qu'ilz peurent saulver de leurs biens. Pareillement les soldatz qui avoient esté mis en garnison aud. chasteau d'Arques commancerent à courir par les champs, couper les vivres et empescher qu'on n'en aportast à Dieppe et faire autres actes d'hostilité.

Vray est que aulcuns dud. lieu d'Arques les plus sages et mieulx advisez, prevoyans bien la ruyne qui leur adviendroit de la guerre et inimityé qu'ilz pourroient avoir avec ceulx de Dieppe leur tindrent propos de venir ensemble à quelque bon accord. A quoy ceulx de Dieppe volontairement entendirent, et après en avoir traicté et deliberé et faict plusieurs allees et venues pour cest effect, furent dressez et mis par escript quelques articles de union et concorde contenant en effect et substance que durant ces troubles ilz s'abstiendroient de courir les ungs sur les autres, ne s'entrenuyre, griever ou offenser en maniere quelconque, et que lesd. habitans de Dieppe n'yroient ou envoyroient faire aulcun mal ou dommage au temple dud. lieu d'Arques, parce que pour eviter toute suspition lesd. habitans d'Arques en mectroient hors les forces qui estoient dedans. Bien leur seroit permis d'y mectre des gens durant la nuyct pour prendre garde qu'on n'entreprinst ou attenptast aulcune chose contre led. temple. Se contanteroient aussy de la garde que monseigneur le duc de Bouillon avoit ordonnee pour le chasteau dud. lieu, sans y recepvoir ny mectre autres soldatz ou gens de guerre et feroient rendre à ceulx de l'eglise reformee dud. lieu d'Arques qui s'estoient retirez en lad. ville [de Dieppe] les biens qui leur avoient esté pillez, et leur permectroient de retorner en leurs maisons pour y vivre paisiblement sans aulcun destourbier⁶⁸ ou empeschement. Ces articles furent accordez et prestz à signer, mais quant ce vint au faire et passer, trois ou quatre des principaulx officiers dud. lieu d'Arques refuzerent à les signer contre ce qu'ilz avoient accordé et permis, de quoy les autres bien marryz⁶⁹ s'excuserent envers lesd. habitans de Dieppe par lettres qu'ilz leur envoyerent le jour de la Trinité xxiiii^e de may oud. an⁷⁰, auquel jour on avoit faict et celebré la cene⁷¹ aud. temple de Saint Jacques.

Le landemain vingt cinq[u]iesme de may⁷², le cappitaine Valfeniere sortit avant le poinct du jour de lad. ville avec vingt cinq hommes de cheval en intention d'aller aux prairyes dud. lieu d'Arques pour prendre et admener les bestes aumailles⁷³ qui avoient accoustumé d'y pasturer⁷⁴, et en ce faisant, attirer ceulx d'Arques pour les charger. Lequel fut suivy d'un grand nombre de mariniers et aultres gens de pied de lad. ville, lesquelz ayans esté descouvertz et se voyans frustrez de l'effect de leur entreprinse, allerent contre l'advis dud. Valfenieres jusques aud. lieu d'Arques pour assaillir le temple et yentrer par force là où ilz trouverent forte resistance. Pourquoy manderent à la ville qu'on leur envoyast de l'artillerye, pouldres et bouletz pour battre⁷⁵ led. temple, ce qui fut faict et leur fut envoyé trois pieces d'artillerye qui furent courageusement traynees par les femmes et approchees dud. temple. Et s'opiniastrerent à le battre jusques vers le soir sans y pouvoir faire bresche. Et cependant par une temerité et folle hardiesse s'exposerent aux coupz d'harquebuzes et de berches⁷⁶ qui leur estoient tirees par ceulx qui estoient dedans à couvert. Tellement qu'il y eut dix des nostres⁷⁷ tuez et environ soixante blecez dont il en mourut du depuis quinze. Et ne tuerent que deux ou trois hommes dedans le temple.

Vray est que durant ceste batterye⁷⁸ tout le peuple du plat pays fut esmeu⁷⁹ et s'assemblerent plus de deux mil hommes des paroysses circumvoisines⁸⁰ pour venir au secours de ceulx d'Arques pour empescher lequel secours les gens de cheval qui estoient sortiz de Dieppe estant renforcez jusques à soixante ou soixante dix chevaulx gaignerent la campaigne à grand nombre de gens de pied envoiez de la part de l'eglise de Luneray⁸¹. Si coururent après ces paysans, passerent au travers d'eulx et les mirent à vauderoutte⁸², en tuerent cent ou six vingtz⁸³ et en navrerent⁸⁴ grand nombre.

Et ce faict, s'en retournerent à Arques pour radmener ceulx de leur compaignye qu'ilz y auroient laissez là où ilz trouverent le seigneur de Fors qui y estoit venu accompaigné de quelque nombre de gens pour faire la retraicte, lequel après avoir faict encores quelque bravade alentour dud. temple s'en retorna faisant ramener l'artillerye et avec luy tous les autres remportans avec eulx trois ou quatre enseignes des compaignyes des paroisses par eulx defaictes.

Et au partir dud. lieu d'Arque y eut ung conseillier de la court de Parlement natif dud. lieu d'Arques regardant par une fenestre d'en hault d'une maison au travers d'une treillye⁸⁵ qui fut frappé par la teste et mis à mort d'un coup de harquebuze tiré par ung de ceulx de Dieppe qui ne fut congneu. Voylà l'yssue malheureuse d'une entreprinse legierement commancee, mal conduicte et executee, laquelle toutesfois avec le meschief⁸⁶ qui en advint apporta ce bien à ceulx de Dieppe que de ce jour là les paysans oncques puys⁸⁷ n'auzerent s'eslever pour donner secours à ceulx d'Arques et faire la guerre à ceulx de Dieppe.

Et voyans ceulx d'Arque que leur temple leur apportoit tant de dommage le quicterent et habandonnerent et se fortiffierent dedans leur chasteau, appelans à leur ayde le sieur de Ricarville pour gouverneur, auquel le sieur d'Aumalle envoya permission pour cest effect et pour lever et mectre dans ledit chasteau tel nombre de soldatz et hargouletz⁸⁸ qu'il verroit estre requis et necessaire pour la deffence d'icelluy et pour l'envitailler⁸⁹ aux despens du pays.

Mai-juin 1562. Dieppe organise et renforce ses défenses, avec le concours des nombreux réfugiés protestants du pays de Caux et de Picardie

D'aultre part les habitans de Dieppe, voians la guerre allumee partout, adviserent à fortiffier leur ville et à mectre la citadelle⁹⁰ en deffense, laquelle estoit lors aysee à gaigner. Et de ce fut la charge donnee au seigneur de Coudray⁹¹, gentilhomme envoyé par monsieur de Senerpont⁹², continuerent aussy ung fort autresfois commancé sur le Pollet au lieu nommé la Bastille⁹³ soubz la conduicte de Monsieur de Saane⁹⁴ qui y fit besongner en extreme dilligence.

En quoy lesd. habitans s'employerent continuellement à travailler, remuer terres et porter la hotte, tant hommes que femmes de toutes qualitez jusques aux dames et damoiselles qui n'y espargnerent leur peyne pour monstrer exemple aux aultres.

Et d'aultre costé concluerent de labourer les prairyes prochaines⁹⁵, y gecter l'eaue de la mer par les escluses de lad. ville pour empescher les approches de ce costé, monterent l'artillerye de lad. ville en grand nombre tant de fer que de fonte, firent amaz et provision de munitions de guerre, oultre ce qu'ilz en avoient, comme de pouldres, bouletz, harquebuzes, picques, corceletz⁹⁶, morions⁹⁷ et aultres armes qu'ilz firent apporter, tant d'Angleterre que de Flandres. Et firent apporter d'Angleterre par le congé⁹⁸ de la royne⁹⁹ dud. pays deux mil mynes de bled¹⁰⁰.

Et si dresserent une compaignie de cinquante chevaulx des gens de la ville dont la conduicte fut baillee au contrerolleur Le Noble¹⁰¹ de lad. ville, avec lequel se joignirent plusieurs gentilzhommes et autres estrangiers qui estoient venuz en lad. ville, oultre une aultre compaignye de semblable nombre d'Escossoys¹⁰² entretenue aux despens d'icelle ville.

Et pour fournir à tout ce que dessus s'ayderent de leurs deniers commungs, de l'argenterye des deux temples et d'une partie des cloches, vendirent rentes sur le revenu de la ville, emprunterent deniers et se cottizerent en particulier, de sorte que en six ou sept mois ilz firent despense pour la guerre jusques à plus de soixante mil livres¹⁰³ oultre le coust, peyne et travail d'un chacun en particulier, tant à s'armer que à besongner¹⁰⁴ aux rempars et creuzer les fossez de la citadelle et à faire la garde ordinaire du guet et des portes de la ville que chacun aiant pouvoir¹⁰⁵ estoit subject de faire deux foys la sepmaine.

Oultreplus, establirent ung conseil composé de douze¹⁰⁶ notables personnages de lad. ville, tous conseilliers et officiers de la maison de ville, officiers de la justice que aultres, lequel fut depuis augmenté de quatre personnes dont seroit chief led. sieur de Fors pour ordonner des affaires qui se presenteroient durant ceste guerre, par l'auctorité duquel conseil furent faictes deffenses à toutes personnes à son de trompe et cric publicq de porter hors de lad. ville aulcuns vins ou aultres vivres, marchandises ne biens quelconques sans le congé dud. conseil.

Et fut faict inventaire des biens des papistes¹⁰⁷ qui estoient retirez hors de lad. ville pour les bailler en garde à ceulx qui s'estoient logez en leurs maisons et les rendre en l'estat qu'ilz leur seroient baillez. Or estoient venuz à refuge en lad. ville plusieurs estrangiers fidelles espars par tout le pays, tant hommes que femmes, gentilzhommes, damoiselles et aultres, et mesmes de villes d'Eu¹⁰⁸ et de Neufchastel¹⁰⁹, pareillement ceulx de l'eglise de la Picardye, comme d'Amyens¹¹⁰, Montereul¹¹¹, Boulongne¹¹², Conty, Roye, Mondidier¹¹³, avec leurs ministres estans jusques au nombre de douze¹¹⁴, lesquelz pour eviter la cruaulté des ennemys tenans la religion contraire-furent contrainctz de quicter et habandonner leurs maisons et heritages après avoir souffert plusieurs opprobres et le ravissement de leurs meubles¹¹⁵ jusques à despouiller plusieurs gentilzfemmes de bonne maison et aultres qui se saulvoient toutes nues en lad. ville, chose pitoyable à veoir, tous lesquelz estrangiers furent accommodez de logis et les pauvres et indigens secouruz, tant des deniers de l'eglise que de l'aumosne publicque et particuliere des gens de bien. Et pour subvenir à telle necessité ceulx de l'eglise d'Anvers¹¹⁶ qui en furent advertiz envoyerent cent escuz¹¹⁷ à l'eglise dud. lieu de Dieppe.

Or fault il recongnoistre la bonté et providence de Dieu en ce que combien qu'on ne vyt jamais la ville tant pleyne de gens qu'elle estoit, et que les officiers d'Arques eussent faict faire deffenses de par le roy par tous les marchez de leur viconté¹¹⁸ d'apporter aulcuns vivres aud. lieu de Dieppe et que les soldatz dud. lieu d'Arques feissent cources¹¹⁹ ordinairement par le pays pour empescher l'apport desd. vivres. Toutesfoys il n'y en eut jamais faulte en leur ville et ne les vyt on passé à longtemps à plus raisonnable pris, et principallement le vin qui ne coustoit que deux solz le pot¹²⁰ et II s. vi d.¹²¹ le meilleur, là où il coustoit quatre solz le pot aud. lieu d'Arques et y en avoit faulte¹²² par tout le pays circumvoisin, en ce pareillement que la peste qui avoit esté en lad. ville ès annees precedentes et continue jusques à l'hyver prochain precedent¹²³ cessa tout à coup et ne veyd on durant l'esté lors courant aulcune personne mallade de peste ny d'autre malladye en la ville.

Juin 1562. Mouvements de troupes entre Dieppe et Rouen

Après que monsieur d'Aumalle eut levé son camp de devant le fort du mont Saincte Catherine lez Rouen¹²⁴ et en fut allé jusques à Moustierviller¹²⁵ et Herfleu[r], ceulx de Rouen renvoyerent à Dieppe la compaignie de gens de pied qui leur avoit esté envoyee. Et mesmement y arriva le sieur de Lanquetot¹²⁶ sur la fin du moys de juing¹²⁷ avec sa compaignye de quatre vingtz chevaulx qui fut payee par lesditz habitans de la somme de dix huict cens livres¹²⁸ pour demeurer en leur service l'espace d'un moys pour le doubte qu'on avoit de la venue dud. sieur d'Aumalle comme le commun bruict estoit partout qu'il vouloit venir assieger lad. ville de Dieppe.

Et de faict il s'achemyna pour ce faire et print à Fescamp¹²⁹ quelques canons qu'il fit remonter pour admener avec luy. Et fit on faire forces pains à Arques, Longueuille, Bourg de Dun¹³⁰ et ailleurs pour la munition¹³¹ de son camp. Mais ceulx de lad. ville ne le redoubterent guieres ains¹³² se preparerent et delibererent de bien le recepvoir et se deffendre et mirent en prison quelques papistes dont ilz avoient desfience, firent faire les monstres¹³³ de tous leurs gens de guerre et aultres, tant habitans de la ville que estrangiers portans armes et mesmes de ceulx de l'esglise de Lunerey¹³⁴ qui s'estoient retirez en lad. ville avec ce qu'ilz avoient peu admener et apporter de leurs bestiaux, grains et autres biens, et au surplus donnans ordre à ce qui estoit requis et necessaire.

Et le jour que les monstres se faisoient vindrent deux hommes en lad. ville envoyez de la part du sieur d'Aumalle vers led. sieur de Lanquetot pour le praticquer¹³⁵ par belles promesses, mais il leur fist responce qu'il n'estoit si meschant¹³⁶ qu'ilz pensoient et que s'ilz voulloient attendre la veue desd. monstres ilz verroient de quelles armes il estoit deliberé de combattre led. sieur d'Aumalle pour luy en faire rapport.

Toutesfois, la grace à Dieu, lesd. habitans ne furent en ceste peyne de soustenir le siege, ains en furent delivrez sans leur faict et comme par miracle parce que comme led. sieur d'Aumalle estoit à Pavilly ou Barantin¹³⁷ pour venir le landemain à Arques, là où on avoit desjà faict ses logis, sur l'issue de son souper, estant encores à table, luy vindrent nouvelles que ceulx de Rouen estoient sortiz et tenoient le Pont de l'Arche¹³⁸ assiegé qui estoit le lieu de sa retraicte¹³⁹, pourquoy se deportant de son entreprinse partyt tout souldain et s'en alla toute la nuyct pour secourir ledit Pont de l'Arche, tout ainsy que Saul poursuyvant David au desert de Maon et le tenant assiegé à l'entour d'une montagne aiant receu nouvelle que les Philistins s'estoient espanduz et gectez sur son pays, se desista de sa poursuitte pour aller au devant desd. Philistins¹⁴⁰.

Le sieur de Lanquetot aiant entendu que led. sieur d'Aumalle avoit torné bride pour retorner vers Rouen, se doubtant bien que de rechief il y yroit mectre le siege devant icelle ville, appella le conseil de la ville de Dieppe et remonstra que son honneur luy commandoit de retorner à Rouen pour raison de la charge qui luy avoit esté donnee en icelle ville, mais quant à sa compaignie s'il plaisoit à ceulx de Dieppe la retenir elle estoit à eulx pour ung moys puysqu'ilz l'avoient payee. Le conseil, veu la mutuelle obligation des deux villes qui combattoient pour une cause commune, ne feist difficulté de laisser aller lad. compaignie avec led. sieur de Lanquetot.

Qui plus est, après que led. sieur d'Aumalle pour la seconde fois eut mis le siege devant Rouen, les habitans de Dieppe estans requis par ceulx qui estoient dedans Rouen, redoubtans ceste venue plus que la premiere pour ce que led. sieur d'Aumalle avoit augmenté ses forces et admené grand nombre de danrés, pouldres, bouletz et aultres munitions, leur envoyerent toutes leurs deux compaignies pour les secourir, esperans pareil secours d'eulx si la necessité se presentoit. Et voyant qu'il n'y leur restoit que les deux compaignyes de gens de cheval, firent lever et dresser une autre compaignie de gens de pied, dont la conduicte fut baillee au cappitaine Montlandrin¹⁴¹.

Juin ou juillet 1562. Escarmouche de Falencourt

Durant ce siege vint advertissement de Calais que le cappitaine Guyon estant au camp avec monsieur d'Aumalle avoit envoyé querir des armes en l[a]dite ville de Calais, pour raison de quoy les gens de cheval de lad. ville le [laissé en blanc] jour de juillet¹⁴² feirent sortye pour aller au devant et les prendre. Et après avoir chevauché ung jour et une nuyct et s'estre enquis d'un costé et d'autre du passage desd. armes, feirent tant qu'ilz les surprindrent par une nuyct en une hostelerye de Falencourt¹⁴³ estant sur le chemin à huict ou dix lieues de Dieppe¹⁴⁴, là où ilz trouverent neuf soldatz qui avoient charge de conduyre lesd. armes, dont les [sic] cinq se saulverent et les autres furent prins et admenez à Dieppe avec trois charettes chargees de cinquante deux corceletz completz¹⁴⁵, vingt six moryons et de quelque nombre de harquebuzes et picques outre les harquebuzes desd. soldatz, qui fut une belle prinse.

Et le jour mesme une compaignie desd. gens de cheval qui estoient allez d'un autre costé trouverent sur le chemyn le lieutenant de la compaignie d'hommes d'armes du sieur de Villebon¹⁴⁶ monté sur une hacquenee¹⁴⁷ et accompaigné de ses grandz chevaulx, lequel aiant apperceu courir après luy lesd. gens de cheval descendyt de dessus sad. hacquenee, monta sur ung de ses grandz¹⁴⁸ chevaulx et se saulva de vitesse quictant ses autres chevaulx et hacquenee qui furent prins et admenez à Dieppe.

23 juillet 1562. Expédition des Dieppois contre le Tréport

Après ce que led. sieur d'Aumalle eut levé led. siege sans avoir peu rien gaigner ains avoit souffert grande perte de ses gens, lesd. cappitaines de Rouverey et Valfenieres retournerent à Dieppe avec leurs compaignies, dont ilz avoient perdu grand nombre de bons soldatz qui avoient esté tuez aud. siege, lequel retour fut le xxi^e juillet oud. an¹⁴⁹, et ne furent guieres en repos.

Car après avoir entendu que ceulx du Tresport¹⁵⁰ avoient arresté quelques pouldres à canon que l'on apportoit d'Angleterre aud. lieu de Dieppe, ilz partirent avec leurs compaignies le xxiii^e dud. mois¹⁵¹ ensemble cent ou vi^xx hommes¹⁵² de cheval pour aller aud. lieu du Tresport distant de sept lieues dud. lieu de Dieppe. Et aiant trouvé que lesd. pouldres avoient esté portees en la ville d'Eu estant à demye lieue¹⁵³ loing dudit Tresport, s'en retornerent après avoir pillé l'abbaye dud. lieu de Tresport¹⁵⁴ et abbattu les ymages estans en icelle et depuis ceulx de la ville d'Eu estans sommez et requis par ceulx de Dieppe rendirent lesd. pouldres à ceulx qui les avoient chargees en Angleterre pour les apporter par deça.

2 août 1562. Expédition des Dieppois contre Cany-Barville, escarmouche et pillage de Veules-les-Roses

Le second jour d'aoust¹⁵⁵ lesd. compaignies et plusieurs habitans de lad. ville, tant à cheval que à pied, sortirent pour faire quelque enterprinse sur le bourg de Cany¹⁵⁶, ung des sieges royaulx du baillage de Caux¹⁵⁷ estant à sept lieues loing de Dieppe pour ce que ceulx dud. lieu de Cany entre les autres s'estoient appertement declarez ennemys mortelz des fidelles¹⁵⁸.

Mais telle enterprinse fut empeschee par ceulx de Veulles et de Sainct Valery en Caux¹⁵⁹ prochains dud. Cany, ce qui reus[s]yst à leur grand dommage et confusion car aians concité¹⁶⁰ tous les villages circumvoisins pour se mectre en armes, amasserent bien jusques à deux mil hommes pour faire teste aux nostres. Mais ilz furent incontinant mis à vauderoutte par vingt cinq avantcoureurs¹⁶¹ des nostres, dont y en demeura ung qui fut tué et s'estant la pluspart de leur compaignye retiree vers la falaize et coste de la mer, y en eut plusieurs lesquelz de craincte de tumber ès mains des nostres se precipiterent de hault en bas de la falaise, dont les ungs furent tuez et les autres bien blecez¹⁶². Et les principaulx d'entre eulx furent admenez prisonniers à Dieppe et led. bourg de Veulles pillé par les nostres et les ymages de leurs moustiers abbattuz et mesmes des autres villages par où ilz passerent.

Par ce moyen fut rompue l'entreprinse d'aller aud. lieu de Cany, mais ceulx dud. lieu n'y gaignerent que l'attente de la punition et vengeance qu'ilz avoient merité des tortz et oultrages par eulx faictz aux fidelles. Car peu de temps après les nostres y retornerent et rav[a]gerent tellement led. bourg qu'il ne demeura rien des meubles qui peuvent estre rapportez sans charroy¹⁶³, et y fut tué l'advocat du roy¹⁶⁴ aud. siege.

12 août 1562. Deuxième expédition des Dieppois contre Arques-la-Bataille. Escarmouche de Martin-Eglise et d'Archelles

Le douziesme dud. mois d'aoust¹⁶⁵ le cappitaine Rouverey estant sorty avec quelque nombre de soldatz trouva moien d'attirer les soldatz d'Arques jusques à Martin Eglise, village prochain¹⁶⁶ où led. de Rouveray avoit faict une embuscade là où lesd. Arquoys furent si bien frottez et poursuyviz jusques à Archelles¹⁶⁷ qu'il y en demeura cinq de mortz sur la place, du nombre desquelz estoit le cappitaine Lalande¹⁶⁸, lieutenant dud. sieur de Ricarville audit chasteau d'Arques, et quelques prins dont y en mourut deux puys après sans y avoir eu des nostres aulcun mort ne blecé.

14 août 1562. Troisième expédition des Dieppois contre Arques-la-Bataille

Le xiiii^e dud. mois d'aoust¹⁶⁹, la compaignye d'hommes d'armes de monsieur d'Aumalle arriva aud. bourg d'Arques pour conduyre les deniers de la recepte des tailles comme l'on disoit, dont les nostres, advertiz, delibererent de les aller trouver et partirent sur la mynuict, estans bien jusques au nombre de huict cens hommes, tant de pied que de cheval, aians tous la chemise vestue par dessus leurs armes, dont l'infanterye tint le chemyn d'en bas et la cavallerye le chemyn d'en hault¹⁷⁰, pensans par ce moien surprendre lesd. hommes d'armes et les enclore dedans led. bourg.

Mais estans lesd. hommes d'armes advertiz par signes de feu que noz ennemyz domesticques firent¹⁷¹, dedans la ville, sortirent hors du bourg attendans noz gens de cheval au passage, lesquelz ilz chargerent et en myrent aulcuns en fuytte, les autres courageusement passerent au travers d'eulx et en blesserent plusieurs de leurs pistolles. Mais il y eut cinq des nostres tuez et n'y en demeura qu'un d'entre eulx que l'on disoit apartenir de paranté ou affinité à monsieur de Guyse dont le cheval fut admené à Dieppe. Cependant nostre infanterye qui n'avoit congnoissance de lad. rencontre¹⁷² feit quelque ravage aud. bourg.

Août 1562. Les Dieppois appellent la reine d'Angleterre à l'aide. Elle envoie des troupes. On chasse des catholiques de la ville

Environ ce temps¹⁷³ led. sieur de Fors estant mallade d'une jambe assembla au chasteau le conseil de la ville et quarante ou cinquante des principaulx bourgeois, ausquelz il proposa qu'il avoit entendu de bonne part les desseings du sieur de Guyse de venir mectre le siege devant Rouen, où il admeneroit toutes les forces du roy, et lequel mesme il y feroit venir en personne avec la royne sa mere et le roy de Navarre¹⁷⁴ pour se couvrir de leur manteau comme il avoit faict jusques alors en toutes ses entreprinses et que son intention estoit de venir jusques devant Dieppe fust devant ou après.

Parquoy¹⁷⁵ estoit besoing ausd. habitans de pourveoir à leurs affaires et bien considerer que leurs forces n'estoient suffisantes pour resister au camp du roy sans le secours d'aultruy, et qu'il ne failloit esperer le secours de monsieur le Prince¹⁷⁶ pour ce que son armee ne seroit de longtemps preste de se mectre en campaigne, qu'ilz eussent doncq à adviser s'ilz vouldroient pas bien requerir l'ayde de la royne d'Angleterre, tant de gens que d'argent, et luy envoyer marchandises de la ville pour assurance de l'argent qu'elle leur pouvoit prester à leur necessité plustost que s'abandonner en proye à ung si cruel ennemy que led. sieur de Guyse, duquel ilz ne debvoient attendre ny esperer aulcun mercy¹⁷⁷.

 Ce propos estonna fort lesd. habitans, lesquelz neantmoings demeurerent fermes en ceste oppinion d'attendre plustost ce qu'il plairoyt à Dieu leur envoyer que d'appeller les Angloyx à leur ayde pour les introduire à leur ville, de paour¹⁷⁸ qu'ilz ne demeurassent maistres de la ville pour la perpetuelle reproche que lesd. habitans en pourroient encourir, eulx et leur posterité. Bien furent d'advis de demander ayde à la royne d'Angleterre de toutes les commoditez qu'ilz pourroient avoir de son pays, et qu'on y envoiast des marchandises de la ville pour sur icelles recouvrer de l'argent et luy supplier que son bon plaisir fust leur donner seur avres¹⁷⁹ et lieu de refuge en son royaulme si les choses succedoient si mal pour eulx qu'ilz fussent contrainctz de s'y retirer.¹⁸⁰

Or il estoit assez congneu partout que monsieur le vidame de Chartres¹⁸¹ estoit passé en Angleterre pour demander secours à la royne dud. pays pour monseigneur le prince, laquelle royne envoya en France une protestation par elle faicte touchant le secours qu'elle avoit deliberé d'envoyer, et fut icelle protestation premierement envoyee aud. lieu de Dieppe et leue devant le peuple en plaine assemblé de ville.

Pareillement vindrent devant Dieppe trois grandes roberges¹⁸² d'Angleterre et ung flouyn¹⁸³ qui poserent l'ancre à la radde, dedans l'une desquelles roberges estoit le visadmiral d'Angleterre¹⁸⁴ qui descendyt à Dieppe et fut honnorablement receu et festoyé par le sieur de Fors et aulcuns habitans de la ville.

Et pour ce que les cappitaines Rouvray et Valfenieres tindrent quelque propos avec monsieur de Morvillier¹⁸⁵ passant par Dieppe et qui naguieres avoit commandé à Rouen, et avec monsieur de Gamaches¹⁸⁶ qu'on ne debvoit recepvoir lesd. Angloix en la ville de Dieppe pour craincte qu'ilz ne la voulsissent tenir par force, et qu'il n'y eut moien de les mectre dehors, led. sieur de Fors adverty de telz propos, et auquel aussy les hayneux et malveuillans desd. Rouverey et Valfenieres avoient faulcement donné à entendre qu'ilz brassoient quelque trahison contre la ville les feit constituer prisonniers aud. chasteau le vingt neufiesme dud. moys d'aoust¹⁸⁷, et ne fut ce jour là permis à leurs compaignyes de sortir hors du logis.

Et pour ceste cause les bourgeois de la ville renforcerent la garde et firent pendre la nuyct des lanternes aux fenestres des maisons pour donner clarté aux rues. Et depuis furent leurs compaignyes baillees à conduyre au cappitaine Monlandrin et au cappitaine Couldray¹⁸⁸. Mais Dieu voulust qu'avec le temps leur innocence fut congneue.

 Le xxv^e d'aoust¹⁸⁹, aulcuns papistes les plus suspectz furent chassez de la ville, leur permectans emporter leurs biens qui ne pouvoient servir durant ung siege et retenans les autres par bon inventaire, dont y en eut plusieurs qui revindrent, promectans vivre et mourir avec les autres pour la deffense de la ville, et aulcuns d'eulx firent profession de l'Evangile¹⁹⁰. Mais la fin a demonstré en la pluspart que ce n'estoit que par ypocrisie.

17 septembre 1562. Quatrième combat à d'Arques-la-Bataille, incendie et pillage de l'église et du bourg

Le xvii^e de septembre¹⁹¹ la compaignye de cent hommes de cheval naguieres dressee par le sieur de Belleville¹⁹² fut rencontree par les nostres au dessus d'Arques¹⁹³, laquelle pour son coup d'essay y faict assez mal son prouffict, car il y en eut quinze de lad. compaignie tuez, et Adrian Le Conte¹⁹⁴, ennemy juré de l'Evangile qui s'estoit retiré de Dieppe aud. lieu d'Arques et ung sien oncle prins et admenez prisonniers et le reste vivement et de si près chassé et poursuivy par les nostres jusques sur le pont du chasteau d'Arques que peu s'en faillut qu'ilz n'entrassent pelle mesle dedans led. chasteau où lad. compaignye feit sa retraicte sans qu'il y eust ung seul des nostres tué en lad. rencontre.

Le landemain¹⁹⁵ sortyt grand nombre de soldatz et habitans d'icelle ville pour aller à Arques querir et apporter dedans les basteaux qu'ilz firent mener pour cest effect le boys à brusler estant aux rives dud. lieu, auquel voyage ilz mirent le feu au comble du moustier¹⁹⁶ dud. lieu fort somptueuz et magnificque¹⁹⁷, lequel comble fut entierement bruslé, les ymages dud. moustier abbattuz et les vittres belles et riches toutes brisees et cassees. Et si myrent le feu à la porte du belle¹⁹⁸, qui s'estendyt jusques à quelques maisons prochaynes qui en furent bruslees. Et ne laisserent rien aud. bourg de tous les meubles qu'ilz y trouverent, faisans par ce moien la vengeance de la perte des nostres advenue au premier assault dud. moustier dont a esté parlé cy dessus.

Septembre-octobre 1562. Nouveaux mouvements de troupes entre Dieppe et Rouen assiégé et nouvelle arrivée de troupes anglaises à Dieppe

Plusieurs autres sortyes et cources furent faictes par les nostres, jusques à cinq et six lieues à l'environ de Dieppe¹⁹⁹, tant pour faire despendre les cloches des moustiers que autrement endommager noz ennemys. En quoy faisant fut estroictement deffendu de ne mesfaire aulcunz en corps ny en biens aux laboureurs qui n'avoient prins les armes contre nous. Et si les soldatz s'estoient aulcunesfoys desbordez à leur faire tort, il leur en estoit faict raison et justice. Et à ceste fin furent commis trois personnages du conseil pour recepvoir les plainctes qui en seroient faictes, ouyr les partyes et en faire rapport aud. conseil.

Le dernier jour dud. moys de septembre²⁰⁰ qui fut tost après led. siege mis par monsieur de Guyse devant la ville de Rouen, là où le roy estoit venu en personne avec la royne sa mere, le roy de Navarre et monsieur le connestable, lesd. cappitaines Rouverey et Valfenieres furent delivrez et mis hors de prison au moyen de la poursuitte que firent le cappitaine Gordes et le cappitaine Mouvins²⁰¹ estans venuz exprès pour cest effect de lad. ville de Rouen.

Et le mesme jour partirent tous sur les dix heures du soir avec monsieur de Briquemault²⁰² estant lors à Dieppe où il estoit venu de Rouen, et une compaignye de gens de cheval dud. lieu de Dieppe pour aller secourir ceulx de Rouen, et menans avec eulx des chevaulx chargez de pouldre à canon. Mais le landemain led. sieur de Bricquemault retorna avec quelques gens de cheval qui s'estoient escartez pour l'obscurité de la nuyct, lequel sieur de Bricquemault peu de temps après se fyt porter dans ung basteau au Havre de Grace²⁰³.

Le tiers jour d'octobre²⁰⁴ arriverent à Dieppe trois compaignyes d'Angloix estans jusques au nombre de cinq à six cens²⁰⁵, fort bien armez et en bon equipage²⁰⁶, envoyez par la royne d'Angleterre à la poursuitte des deputez de monsieur le Prince²⁰⁷ pour secourir les fidelles estans en lad. ville, lesquelz furent receuz par le sieur de Fors par le consentement des habitans de la ville voyans l'extreme et urgente necessité et qu'ilz auroient bien le moyen de s'en desfaire et les mectre hors quant le temps le requerroit, parce qu'ilz ne leur permirent se saisir des fortz de lad. ville.

Et le landemain²⁰⁸ fut faicte la cene au temple Saint Jacques en grand nombre de personnes, où assisterent les cappitaines angloix, ausquelz fut faict ung bancquet honnorable en la maison de ville.

Du depuys on envoya au secours de Rouen deux cens hommes de pied choysiz sur les compaignies dud. lieu de Dieppe avec la compaignie d'Escossoys estant à cheval et six vingtz²⁰⁹ harquebuziers à pied des vielles bandes d'Escosse qui naguieres s'estoient desrobez de leur pays et estoient venuz à Dieppe.

Octobre 1562. Escarmouches autour de Dieppe avec des contingents de l'armée royale

Durant ce siege sept à huict cens reistres²¹⁰ de la compaignie du comte de Raingrave²¹¹ estoient ès environs de Dieppe, pillans aussy bien le papiste que le huguenot²¹², et n'aprocherent jamais de Dieppe sans estre escarmouchez, et lesquelz se monstrerent le xv^e jour dud. mois d'octobre²¹³ assez près du fort de la citadelle, ausquelz on tira plusieurs coups d'artillerye. Et lors sortirent quelques Ecossoys à cheval avec leurs lances legieres pour les escarmoucher et quelque nombre de soldatz, tant françoys que angloix, et ung Escossoys. Et d'une part et d'aultre y en eut plusieurs blecez et deux chevaulx desd. reistres furent trouvez mortz sur la place où avoit esté donnee l'escarmouche.

En ce temps aussy le sieur d'Annebault²¹⁴ estoit logé aux champs pres lad. ville avec sa compaignie d'hommes d'armes, et alla led. sieur d'Annebault à la source de nostre fontaine²¹⁵, dont il couppa ung cahot²¹⁶ ou canal pour nous oster la commodité de l'eaue venant à lad. ville. Mais Dieu voulut que, pensant qu'il n'y eust qu'un cahot, il laissa le second en son entier²¹⁷, qui nous fournist d'eaue à suffisance.

17 octobre 1562. Défaite près de Pavilly de troupes de secours dieppoises envoyés au secours de Rouen

Le xvii^e d'octobre²¹⁸ lesd. habitans, advertiz de la necessié de ceulx de Rouen qui avoient perdu grand nombre de bons soldatz et gens de bien durant ce siege leur envoyerent pour le dernier secours qu'ilz leur pouvoient deux compaignies de gens de pied qui leur restoient, dont estoient cappitaines le sieur du Couldray et le sieur de Monlandrin, lesquelz partirent sur les dix heures du soir mais furent rencontrez près des boys de Pavilly à deux ou trois lieues de Rouen²¹⁹ par la compaignye de monsieur de Danville²²⁰ bien informé de leur venue.

Et y eut grand nombre desd. soldatz taillez en pieces, autres prins prisonniers, tant par ceulx du camp que par les paysans, et les autres mis en fuytte qui eschaperent avec leurs cappitaines et revindrent à Dieppe quasi tous devalisez par lesd. paysans, et furent revestuz aux despens de la ville en laquelle rencontre furent prins trois ministres qui estoient partiz de Dieppe avec lesd. compaignyes, dont l'un eschappa. Puys après ung autre nommé Maistre Euvrard, qui avoit esté aultrefoys ministre pour les Françoys en l'eglise de Londres et du depuis en l'eglise d'Amyens fut gecté et noyé dedans une revyere et quant à l'aultre on n'a peu sçavoir comme il est mort.

Fin d'octobre 1562. Négociations des Dieppois avec le pouvoir royal

Le xxii^e jour d'octobre²²¹, le sieur de Bois d'Ennebourg²²², accompaigné d'un aultre gentilhomme et d'un trompette du chasteau d'Arques arriva à la porte de la ville, demandant à parlemanter avec les habitans d'icelle, disant estre envoyé de la part de la royne mere avec lettres de creance. Surquoy par l'advis et deliberation du conseil, le sieur de Fors avec aulcuns dud. conseil et les cappitaines angloix sortirent hors de lad. ville pour ouyr ledit sieur de Bois d'Ennebourg en sa creance, dont le jour mesme fut faict rapport par led. sieur de Fors en assemblee generalle desd. habitans, qui estoit que ladite dame demandoit ausd. sieur de Fors et habitans de lad. ville qu'ilz eussent à rendre lad. ville ès mains du roy, leur offrant en ce faisant les conditions accordees par led. seigneur à ceulx de Rouen, dont il portoit le coppye, pareilles comme il disoit à celles de Bourges²²³, disant que ceulx de Rouen estoient prestz de les accepter.

Surpuoy après avoir ouy le sieur de Hermesey²²⁴, chef des compaignies angloises, lequel remonstra qu'il n'avoit esté envoyé de la part de la royne sa maistresse que pour la deffense desd. habitans [de Dieppe] et qu'il ne les voulloit empescher d'adviser à leurs affaires et pourveoir à leur salut, mais prioyt qu'on l'advertist de bonne heure si on vouloit faire aulcun accord touchant la reddition de lad. ville affin que saulvement²²⁵ il se peust retirer avec ses compaignyes. Surquoy fut conclud d'envoyer le procureur de lad. ville par devers lad. dame en la compaignye dud. sieur de Bois d'Ennebourg, à laquelle dame après luy avoir remonstré la fidelité et obeyssance desd. habitans, il supplioyt luy donner le sauf conduict pour entrer en la ville de Rouen pour entendre si ceulx de lad. ville estoient prestz de composer et accepter lesd. conditions, en quoy faisant et non autrement il les accepteroit. Et suyvant ceste resolution, après avoir accordé avec led. sieur de Bois d'Ennebourg qu'il laisseroit pour hostage en lad. ville le gentilhomme admené avec luy, led. procureur partyt pour aller par devers lad. dame estant au camp devant Rouen, luy portant lettres dud. sieur de Fors.

Et après qu'il les eut presentees à lad. dame elle luy refuza sauf conduict d'entrer à Rouen et luy remonstra que ceulx de Dieppe ne se debvoient abuzer sur une vaine fience qu'ilz avoient en ceulx de Rouen, et qu'ilz se donnassent bien garde de s'opiniastrer²²⁶ comme eulx s'ilz aymoient leurs vyes et celles de leurs femmes et enffans, et qu'ilz verroient bientost de quoy avoit servy à ceulx de Rouen leur opiniastreté, et que si ceulx de Dieppe refuzoient maintenant d'accepter les conditions à eulx offertes, qu'ilz n'esperassent d'y retorner après. Et atant renvoya led. procureur et led. sieur du Bois d'Ennebourg avec lettres addressees ausd. habitans dont la teneur s'ensuyt :

« Messieurs, aiant entendu par vostre procureur de ville la bonne volunté que vous avez de rendre au roy monsieur mon filz l'obeissance que vous luy debvez, je ne vous veulx celer que j'en ay receu ung grand contantement, mais pour ce qu'il fault venir promptement à l'effect et execution de voz parolles, je vous envoye le double de la capitulation faicte avec ceulx de Bourges pour la reddition de lad. ville ès mains du roy mond. sieur et filz, suyvant laquelle il fault que vous luy rendiez lad. ville de Dieppe, monstrans en cela combien vous luy estes obeissans et fidelles subjectz et serviteurs et que vous ne voulez poinct perdre l'heureux repos et les grandz privileges²²⁷ et libertez dont vous avez jouy soubz l'obeissance de ceste Couronne pour vous asservir miserablement soubz la puissance de l'estrangier et mectre en proye les vyes et les biens de vous, voz femmes et voz enffans, chose que vous regarderez de mectre en consideration affin de vous laisser plustost persuader de la raison et de ce qui est du debvoir de vostre fidelité que de la passion de ceulx qui pour servir à leurs particulieres ambitions ne cherchent que de vous mectre au peril et hazard de vostre ruyne. Et sur ce, Messieurs, je prie Dieu qu'il vous ayt en sa très saincte garde. Escript au camp près Rouen le xxi^e d'octobre 1562. ».

A laquelle lettre lesdictz habitans donnerent response qui fut portee par ledit sieur du Bois d'Ennebourg telle que ensuyt :

« Madame, nous vous avons faict suffisamment entendre que nous tous n'avons esté, ne sommes et ne serons jamais en autre volunté que de vivre et mourir au service et obeissance du roy comme nostre prince naturel et souverain seigneur ordonné de Dieu pour nous commander, et sçavons bien que la ville de Dieppe luy apartient, et l'avons tousjours gardee comme ses predecesseurs roys se sont fiez à nous de la garder et esperons encores la garder pour luy et soubz son auctorité comme ses très humbles et loyaulx subjectz. Et n'est poinct nostre intention ny ne sera jamais de nous asservir à ung estrangier pour nous destorner de la subjection de nostre prince naturel. Parquoy, Madame, nous vous supplions très humblement de vous assurer sur nostre fidelité et croyre que ce que nous faisons n'est poinct pour prendre les armes ny user de rebellion contre nostre roy, mais seullement pour conserver sa ville soubz son obeissance principallement devant sa minorité et au temps que nous voyons noz biens et noz vyes exposez en proye si nous nous soubzmectons à la mercy de ceulx qui contreviennent aux edictz du roy suyvant lesquelz nous desirons estre maintenuz et conservez en la protection et sauvegarde du roy et de vous, Madame. De Dieppe, le xxiiii^e d'octobre²²⁸. »

Les piteuses nouvelles de la prinse de Rouen advenue le xxvi^e dud. moys et du sac d'icelle²²⁹ estonnerent fort les habitans de ladite ville de Dieppe, se voyans d'un costé destituez de leurs freres qu'ilz avoient envoyees [sic] à Rouen et ne leur rester que bien peu de soldatz avec les Angloix ausquelz ilz n'avoient pas trop de fience, et d'aultre costé estans hors d'espoir du secours opportun de monsieur le prince de Condé veu les lettres que mond. sieur l'Admiral avoit naguieres escriptes aud. sieur de Fors que l'armee de monsieur le Prince n'estoit encore prestes de se mectre en campaigne.

Et pour ce que le bruict vint soubdainement que l'artillerye du roy marchoit pour venir assieger lad. ville et que tout à coup arriva led. sieur de Bois d'Ennebourg avec ung trompette pour sommer lesd. habitans de rendre la ville au roy fut tenu conseil en la presence des cappitaines, tant angloix que autres, et aulcuns gentilzhommes s'estans retirez en lad. ville pour sçavoir qu'il estoit de faire et si on attendroit le siege. Et après avoir eu l'advis desd. cappitaines et gentilzhommes et autres gens de guerre qui dirent que lad. ville estant aussy desgarnye qu'elle estoit n'estoit pour resister au camp du roy, fut conclud de renvoyer ledit procureur de ville par devers la royne avec le sieur de Saint Pierre²³⁰, gentilhomme esleu d'entre les autres pour accorder et mectre la ville ès mains du roy et faire retirer les Angloix moyennant les conditions par cy devant offertes, et par ce qu'il plairoit à Sa Majesté leur octroyer qu'ilz puissent continuer librement la predication de l'Evangille et aultres exercices de leur religion.

Et vint bien à propos que le sieur de Basqueville²³¹ arriva en lad. ville le jour de lad. deliberation, estant envoyé de la part de la royne pour exhorter lesd. habitans de n'attendre le peril evident qui les menassoit s'ilz attendoient la venue du camp du roy, lequel sieur de la Basqueville voulut bien tant faire pour eulx qu'il s'en alla avec les deleguez de lad. ville et avec led. sieur de Bois d'Ennebourg pour leur ayder envers la royne à impetrer²³² ce qu'ilz demandoient. Si partirent tous ensemble et presenterent au roy les articles qui ensuyvent en forme de requeste :

« Les habitans de la ville de Dieppe supplient très humblement au roy de les advouer et tenir pour bons et loyaulx subjectz et très obeissans serviteurs de Sa Majesté, comme de leur part ilz protestent devant Dieu et les hommes qu'ilz n'ont jamais esté, ne sont et ne seront en autre volunté que de vivre et mourir en son service avec telle fidelité, reverence et obeissance que vrayz subjectz doibvent à leur roy et prince naturel, lequel ilz recongnoissent et ont tousjours recongneu pour leur souverain magistrat²³³ à eulx ordonné de la main de Dieu.

 Qu'il plaise aud. seigneur declarer qu'il a tenu et tient lad. ville, manans et habitans d'icelle en sa protection et sauvegarde, leur donnant seurté et promesse de les conserver en leurs corps et biens avec jouyssance de leurs privileges sans aulcunement les rechercher ny forcer la liberté de leurs consciences pour le faict de la religion et exercice d'icelle, tant du passé que de l'advenir. Et affin de les mieux contenir en l'honneur et craincte de Dieu et obeissance du roy, qu'ilz puissent ouyr la predication de l'Evangille par ung ministre suyvant qu'il a pleu au roy et à son Conseil le permectre par les edictz qui ont esté publiez et passez par les parlementz.

Que led. seigneur desclare qu'il ne veult ne entend que l'on impute aulcune chose aux gouverneurs, conseilliers, officiers de la justice et aultres manans et habitans de lad. ville de quelque qualité et condition qu'ilz soient à cause des troubles de la religion, soit pour portz d'armes ou autres actions generallement quelconques qu'on leur vouldroit reprocher pour le passé en quelque sorte ou maniere que ce soit et sans qu'ilz soient comprins aux arretz de la court ny quelconques edictz du roy faictz par cy devant ne qu'il leur soit besoing obtenir autre plus specialle ne particuliere declaration.

Que les gentilzhommes et aultres subjectz du roy, soient [sic] officiers de Sa Majesté ou d'autre qualité, [qui se sont]²³⁴ retirez en lad. ville comme à refuge pour la seurté de leurs personnes, soient traictez de mesme faveur et protection sans estre forcez en leurs consciences ny troublez pour l'exercice de la religion, et que les vouloir et declaration du roy soient publiez en lad. ville et par tout le baillage de Caux, avec deffense de plus faire aulcunes aggressions, cources, pilleryes, seditions, meurtres, oultrages, ny quelconques actes de guerre pour le faict de la religion, sur peyne de la vye. Et qu'il plaise au roy donner temps de faire vuyder les Angloix estans en lad. ville. »

Au dessoubz desquelz articles fut escript l'accord du roy tel que ensuyt :

« Le roy accorde le contenu en la presente requeste, reservé les presches que Sa Majesté n'entend plus avoir lieu en son royaulme en autre forme que celle qui s'observe en son eglise. Bien vivront ilz en liberté de conscience en leurs maisons sans estre aulcunement recherchez.

 Et quant à la retraicte des Angloix elle²³⁵ entend qu'elle se face dedans dymanche²³⁶ pour tout le jour, et au demeurant entend avoir la response resolue desd. habitans pour tout demain affin que le landemain elle puisse depescher en la ville et citadelle dud. Dieppe monsieur le Mareschal de Montmorancy²³⁷ qui s'y achemynera cependant²³⁸. Faict à Rouen le penultime²³⁹ d'octobre 1562. » Sygné Charles, et plus bas Bourdin²⁴⁰.

Le landemain, dernier jour d'octobre²⁴¹, lesd. articles ainsy accordez furent apportez et presentez ausdictz habitans par led. sieur de Basqueville avec lettres de la royne baillees aud. procureur de ville dont la teneur ensuyt :

« Messieurs, je vous renvoye ce porteur²⁴² avec la resolution que le roy monsieur mon filz a prinse sur le contenu ès articles qu'il luy a presentez et les remonstrances²⁴³ qu'il luy a faictes de vostre part. En quoy vous verrez que sa bonté s'est si avant estendue que vous aurez grande occasion d'en louer Dieu et de recongnoistre par une prompte et humble obeissance la grace dont le roy mond. sieur et filz use envers vous en cest endroict, laquelle, pour l'amityé que je vous porte, et le desir que j'ay à vostre conservation, je vous prie vouloir accepter et ne vous laisser persuader de ceulx qui ne cherchent que vostre ruyne et perdition. Car quant à la seurté qui vous est accordee par lesd. articles, je la vous feray expedier telle qu'elle vous sera necessaire, et jusques à la faire emologuer²⁴⁴ par la court de Parlement ainsy que je l'ay dict à ce porteur. Priant Dieu, Messieurs, qu'il vous ayt en sa saincte garde. Escript à Rouen le penultime octobre 1562. »

Lesquelz habitans, avec ung merveilleuz regret et deplaisir de ce que les presches leur estoient deffenduz, voyans que leur reffuz ou resistance ne prouffiteroit de riens et en esperance qu'avec le temps, par la grace de Dieu, elles²⁴⁵ leur seroient restituees, signerent lesd. articles qui furent renvoyez au roy, lequel d'habondant²⁴⁶ accorda ausd. habitans autres articles qui ensuyvent :

« Premierement, que les cappitaines et soldatz, gentilzhommes et autres, tant de la ville de Neufchastel que des environs de Dieppe, et mesmes aulcuns bourgeois de la ville d'Eu qui ont esté à Dieppe pour la deffense d'icelle et porté les armes, tant en lad. ville que aillieurs, depuis le commancement de ces troubles, sont comprins et entenduz audit traicté et accord, encores que aulcuns d'eulx se fussent trouvez au premier siege de Rouen et que le roy leur permect avec toute seureté eulx retirer en leurs maisons avec mainlevee²⁴⁷ de leurs biens et heritages et sans les troubler ne molester en leurs personnes et biens et permis aux gentilzhommes de porter pistolles²⁴⁸ pour resister aux volleurs qui les vouldront offenser et pour le service du roy sans en abuser.

Item, affin d'eviter le trouble et confuzion qui adviendroit entre le peuple avec une infinité de procès et aultant de querelles et vengeances particulieres, il a pleu au roy mectre soubz le pied et abolir la memoire de toutes pilleryes et cources faictes les ungs sur les autres, et des brisementz de temples, bruslementz, abbattementz d'ymages, et enlevement de cloches et ornementz, et que l'on n'en puisse susciter aulcun procès ne chercher recompance de part ou d'aultre ny satisfaction ou reparation des meurtres et oultrages qui ont esté faictz de tous costez.

Item, led. sieur²⁴⁹ a declaré, voulu et ordonné que les fraiz et mises que ladite ville a faictz durant ces troubles pour la deffense, fortiffications, munitions et reparations d'icelles soient passez et allouez en la Chambre des comptes sur les deniers de lad. ville avec commission pour le tout visiter et apprecier, ensemble examiner la declaration et compte desd. fraiz.

Tous lesquelz articles ont esté leuz, publiez et enregistrez en la court de Parlement, ouy le procureur general du roy en vertu des lettres patentes donnees par le roy en son Conseil le iiii novembre oud. an. »

Novembre 1562. Fuite de dirigeants protestants dieppois pour l'Angleterre. Arrivée du maréchal de Montmorency à Dieppe. Il nomme le sieur de Ricarville capitaine du château de Dieppe. Pacification de la ville

Durant que l'on traictoit led. accord et incontinant après icelluy, plusieurs estans en lad. ville de Dieppe, ne s'assurans du tout a telles promesses, les autres malcontans dud. appoinctement²⁵⁰ se retirerent au pays d'Angleterre, du nombre desquelz estoit led. sieur des Fors, le cappitaine Ribault²⁵¹ et plusieurs gentilzhommes et damoiselles, monsieur de Sainct Pol²⁵², ministre de l'eglise dud. lieu, et quelques autres ministres et grand nombre de peuple. Aultres bourgeois de lad. ville se retirerent à Amiens et autres lieux du pays de Flandre et là se tindrent quelque temps, attendans la fin de ceste tragedye. Toutesfois si led. sieur de Fors fust demeuré il eust esté continué et entretenu en son estat et en avoit led. procureur apporté lectres du roy à ceste fin addressantes aud. sieur de Fors.

Et quant aud. sieur de Montmorancy il arriva et entra en lad. ville le second jour du mois de novembre²⁵³ avec sa compaignie d'hommes d'armes l'enseigne desployee, deux compaignyes françoyses de gens de pied et deux compaignies d'Allemantz, à laquelle veue tout le plat pays fut esmeu, pensant qu'on deust saccager la ville. Mais contre leur espoir procedant de maulvaise affection, led. sieur de Montmorancy se monstra doulx, gratieulx²⁵⁴, et favorable aux habitans de ladite ville, lequel pour l'execution de sa charge se saisyt de l'artillerye et munitions d'icelle dont il fit porter la pluspart au chasteau, là où il posa cappitaine le sieur de Ricarville auquel il ordonna lever une compaignye de trois cens hommes de pied pour la garde dud. chasteau qui seroient soldoyez²⁵⁵ aux despens du roy et laissa en lad. ville pour gouverneur le sieur de Basqueville, suyvant les lettres que le roy luy en escripvist, luy ordonnant une compaignie de cent hommes de pied qui seroit entretenue aux despens de lad. ville.

Il feit aussi dire la messe par son chapellain au temple Sainct Jacques par deux ou trois jours qu'il sejourna en lad. ville. Et après avoir donné ordre en l'outreplus²⁵⁶ à ce qui luy sembloit requis et necessaire pour l'establissement de la paix et tranquilité de ladite ville et exhorté les habitans de se contenir en l'obeissance du roy et de se comporter et vivre paisiblement les ungs avec les autres sans entrer en disputes, querelles ou contentions²⁵⁷ pour le faict de la religion, s'en retourna avec les compaignies qu'il avoit admenees et feyt retirer les reistres du comte Reingrave qui estoient logez aux villages circumvoisins de lad. ville, et mesmes la compaignye du seigneur d'Annebault.

Et sur ce que lesd. habitans luy remonstrerent le regret et desplaisir qu'ilz portoient d'avoir esté privez des presches publicques et aultres exercices de leur religion, chose qui pourroit donner occasion à plusieurs de tumber en atheisme et contemnement²⁵⁸ de Dieu et estre cause de faire quicter et habandonner la ville par la pluspart des habitans et mesmement par les maronniers²⁵⁹ qui en sont en grand nombre, lesquelz se pourroient retirer et estre bien venuz en Angleterre dont se pourroit ensuyr²⁶⁰ la ruyne et desolation de la ville au grand prejudice et dommage du roy et de son royaulme, luy suppliant à ceste cause que son bon plaisir fust d'estre moyen envers la Majesté du roy et de la royne de leur restituer la liberté de leur religion qui seroit le vray moien de les faire vivre en paix soubz la craincte et obeissance de Dieu et du roy. Il les exhorta gratieusement²⁶¹ d'endurer et avoir patience pour quelque temps, et qu'ilz envoiassent homme avec luy pour presenter requeste ausd. Majestez du roy et de la royne aux fins que dessus, et qu'il leur ayderoit en ce qu'il pourroit²⁶².

A quoy ne faillirent lesd. habitans, recommandans ceste affaire aud. sieur de Basqueville qui le convoya jusques à Rouen, là où la royne après avoir entendu la requeste et remonstrance desd. habitans et la bonne volunté enquoy led. sieur de Montmorancy les avoit trouvez, les voulut bien gratiffier jusques là que de leur permectre la predication de la parolle de Dieu et autres exercices de leur religion secrettement et en petites compaignies. Et combien qu'elle n'en voulust rien bailler par escript, elle dit touteffois aud. sieur de Basqueville en la presence du roy auquel elle pria d'en avoir souvenance qu'il n'empescheast lesd. habitans en ce que dessus, et qu'il ne luy en seroit rien reproché ny ausd. habitans pourveu qu'ilz se continssent paisiblement en l'obeissance du roy sans trouble ne sedition et sans donner empeschement à l'exercice de la religion catholicque romaine à ceulx qui vouldroient vivre suyvant icelle.

Cela apporta grand joye et contantement ausd. habitans suyvans la religion reformee et vint bien à propos que les ministres qui estoient eschappez du sac de Rouen et plusieurs habitans d'icelle ville se vindrent rendre comme à sauveté en lad. ville de Dieppe, laquelle il sembloit bien que Dieu avoit reservé pour leur refuge. Et fut faicte une cueillette²⁶³ extraordinaire par les anciens²⁶⁴ de l'eglise pour subvenir aux necessitez de ceulx dud. lieu de Rouen qui n'avoient moyen de pouvoir vivre.

Si firent faire presches en lieux privez et sur le soir par chacun jour par lesd. ministres suyvant lad. permission en quatre endroictz de lad. ville, là où les fidelles divisez en huict quartiers allerent tour à tour affin que les assemblees fussent plus petites et par ce moien continuerent l'exercice de leur religion. Et en cet estat vesquirent²⁶⁵ soubz le gouvernement dudit sieur de Basqueville jusques au vingtiesme de decembre, durant lequel temps ne se presenta ung seul presbtre²⁶⁶ pour la messe, combien que led. sieur de Basqueville suyvant le debvoir de sa charge s'offrist aux tresoriers des paroisses et aux principaulx habitans de la religion romaine de leur donner assistence et les garder d'empeschement s'ilz vouloient faire dire messe et leur service accoustumé dedans les temples.

20 décembre 1562. Assassinat du sieur de Ricarville au château de Dieppe. La ville retombe aux mains de chefs protestants refusant la paix avec le roi

Led. vingtiesme decembre²⁶⁷, par ung dymanche matin, led. sieur de Ricarville estant sorty du chasteau à une estable prochaine où il alloit veoir ses chevaulx accompaigné d'un homme seullement, fut meurdry et mis à mort par quatre soldatz qui feignirent aller veoir led. chasteau, lesquelz a l'instant tirerent ung coup d'artillerye estant sur la platteforme du pied dud. chasteau, au son duquel coup accourut une grande compaignie de soldatz estans en une maison de lad. ville prochaine dud. chasteau, conduictz par le cappitaine Gascon²⁶⁸ et le sieur de Catheville Malterre, gentilhomme voysin de lad. ville²⁶⁹, lesquelz aians praticqué les soldatz dud. sieur de Ricarville prindrent led. chasteau et tost après descendirent dudit chasteau et marcherent en armes par les rues de lad. ville, cryant tous d'une voix « vive l'Evangille ! », assurans les habitans de lad. ville qui sortoient de leurs maisons qu'on ne leur vouloit aulcun mal faire et que ce qu'ilz faisoient estoit pour le service de Dieu et du roy et par l'adveu de monsieur le Prince, qui fut cause qu'on ne leur donna aulcune resistence.

Vray est que led. sieur de Basqueville se myt en debvoir de prendre les armes et aucluns des habitans de lad. ville pour resister à telle entreprinse. Mais led. sieur de Basqueville ne fut suivy d'aulcuns de ses soldatz qui avoient esté praticquez par led. cappitaine Gascon et sieur de Catheville, comme ceulx dud. sieur de Ricarville. Parquoy fut contrainct mesmes lesd. habitans se voyans menassez d'estre mis à mort s'ilz se mouvoient de se retirer et fut tost après led. sieur de Basqueville prins en son logis²⁷⁰ par led. cappitaine Gascon et mené prisonnier aud. chasteau et le jour mesme renvoyé sur sa foy²⁷¹ en sond. logis pour y tenir prison.

Et se saysit led. cappitaine Gascon des clefz de la ville et fyt faire criz publicqz par les carefours d'icelle de par le roy et de monsieur le Prince pour estre obey en icelle ville. Ceste surprinse sembla à plusieurs tant de ladite ville que estrangiers estans en icelle estre miraculeusement advenue et executee car encores que le comte de Reingrave en eust au precedent adverty led. sieur de Ricarville et de Basqueville et qu'icelluy sieur de Basqueville et les principaulx de lad .ville eussent faict tout debvoir de descouvrir une telle entreprinse, et pensoient bien avoir pourveu qu'elle ne fust executee, et que mesmes toute la nuyct precedente ilz eussent faict la ronde par toute lad. ville et adverty led. sieur de Ricarville de se tenir sur ses gardes, auquel ilz offrirent entrer avec luy en garde aud. chasteau, ce qu'il refuza, se tenant bien assuré et ne redoubtant rien.

Et encores voyant lesd. quatre premiers soldatz comme aiant quelque desfience d'eulx usa de ces termes à celluy qui estoit avec luy : « voyez vous bien ces rustres, ils seroient aussy bien gens de vouloir tuer ung cappitaine que gens que vous veistes oncques ! »²⁷². Si toutesfois il ne peust eviter ce meschief²⁷³ ny empescher que lad. entreprinse ne fust tout à ung moment executee comme dit est. Parquoy ceulx là d'un costé la prindrent comme venant de la main de Dieu, estimans que la fin en seroit heureuse et reusiroyt à son honneur²⁷⁴ et à l'advancement de l'Evangille.

Décembre 1562. Les Dieppois modérés cherchent à reprendre contact avec le pouvoir royal. A leur tour certains de ces modérés quitent la ville pour l'étranger

D'aultre costé, la pluspart des habitans de lad. ville le prindrent comme un desastre advenu sur eulx, craignans d'encourir la hayne et indignation de la Majesté du roy et de la royne, et qu'il ne leur fust reproché d'avoir violé la foy promise à celluy à qui ilz debvoient toute obeissance, combien qu'il n'y eust aulcunement de leur faict, intelligence²⁷⁵ ou consentement à ung si malheureux acte, duquel ilz advertirent incontinant la royne par lettres contenans à la verité le discours du faict dessusdict, deplorans leur calamité et supplians à Sa Majesté de ne se laisser persuader qu'il y eust en ce de leur faulte, veu qu'il n'estoit vraysemblable qu'ilz eussent voulu estre si ingratz que d'oublier le benefice²⁷⁶ dont le roy avoit usé en leur endroict, ne si maladvisez que de se vouloir priver d'un si heureux repos dont Sa majesté les avoit faict joyssans pour rentrer aux troubles, perilz et inconveniens dont ilz estoient naguieres eschappez et changer leur liberté en miserable servitude, assurans lad. dame qu'elle trouveroit la verité estre telle s'il luy plaisoit en faire informer.

Et de faict les conseilliers de lad. ville et plusieurs aultres des principaulx habitans pour faire preuve de leur innocence quicterent et habandonnerent ce qu'ilz avoient de plus chier et precieulx en ce monde c'est assçavoir²⁷⁷ leurs maisons, biens, femmes, enffans et leur patrie pour aller demeurer en pays estrangés comme en Flandres et ailleurs.

Le xxiii^e dud. mois²⁷⁸, le seigneur de Villebon lieutenant du roy au gouvernement de Normandye estant à Rouen escripvyt lettres ausd. habitans, leur mandant qu'ilz luy feissent entendre la verité dud. faict qu'il disoit ne pouvoir penser estre advenu par leur faulte, veu le bon traictement que le roy leur avoir faict et qu'ilz donnassent ordre en la plus grande dilligence qu'ilz pourroient de faire remectre le chasteau entre les mains du roy, aultrement qu'il voyoit la ruyne de lad .ville et que l'arrivee du roy, qui avoit gaigné la bataille contre monsieur le Prince²⁷⁹ où il avoit esté prins prisonnier et la plus grande partie de ses gens taillez en pieces, n'estoit pas loing d'eulx²⁸⁰ et seroient²⁸¹ tous esbahyz qu'ilz la verroient à leurs portes, ausquelles lettres lesd. habitans donnerent response satisfactoire²⁸² s'excusans dud. faict et remonstrans qu'il n'estoit en leur puissance faire remectre led. chasteau entre les mains du roy, pour ce que eulx mesmes estoient soubz la puissance et mercy de ceulx qui l'avoient surprins et le detenoyent par force.

Le landemain, veille de Noel²⁸³, vindrent lettres en lad. ville de la part du procureur d'icelle estant lors en Court consernant lesd. nouvelles de la prinse de monsieur le Prince et routte²⁸⁴ de son armee, surquoy lesd. habitans prindrent occasion de s'efforcer persuader ausd. cappitaines Gascon et sieur de Catheville qui se vanterent d'avoir faict lad. entreprinse par l'adveu de mond. sieur le Prince de remectre led. chasteau entre les mains dudit sieur de Basqueville pour le garder pour le roy et le laisser commander en lad. ville comme il faisoit auparavant. En quoy faisant ilz ne feroient chose contraire à leur debvoir attendu que led. sieur de Basqueville favorisoit la religion²⁸⁵ et estoit homme pour rendre compte dudit chasteau au roy et à mond. sieur le Prince, et si delivreroient lesdictz habitans de la ruyne qui autrement les menaçoit de près. Et pour les faire à ce condescendre leur offrirent et soubz main leur firent offrir grande somme d'argent mais ce fut en vain et par ceste voye n'y peurent rien gaigner.

Décembre 1562. Meurtre du soldat Martin. Accueil peu enthousiaste de Dieppe envers le comte de Montgomery

Le jour de Noel le cappitaine Gascon et ceulx de sa faction reprindrent le temple et y firent prescher les ministres ainsy qu'on avoit faict auparavant lesd. accordz.

La nuyct ensuivant²⁸⁶ ilz tuerent d'un coup de harquebuze ung vaillant soldat de lad. ville nommé Jaques Martin en hayne de ce qu'il avoit apporté les nouvelles de la Court de la prinse de mond. sieur le Prince et qu'ilz avoient entendu qu'il estoit delegué de la part desd. habitans pour retorner en lad. Court advertir le roy et la royne de ce qui estoit advenu en ladite ville, et lequel Jacques Martin avoit esté prins au camp de monsieur d'Aumalle²⁸⁷, courageusement combattant et longuement detenu prisonnier dont il avoit esté naguieres delivré et fut regretté de tous ceulx de la ville.

Le dymanche prochain, qui fut le xxvii^e dud. moys²⁸⁸, le comte de Montgomery²⁸⁹ estant party du Havre de Grace²⁹⁰ avec trois compaignyes françoyses de gens de pied et grand nombre de gentilzhommes qui le suyvoient arriva en lad. ville. Et receurent lesd. habitans lettres du sieur de Beauvais²⁹¹, gouverneur aud. lieu du Havre par lesquelles il les prioyt de ne se donner poinct de peyne de ce que monsieur de Briquemault, led. comte de Montgomery et luy²⁹² avoient tasché de remectre lad. ville en l'obeissance du roy soubz l'auctorité de monsieur le Prince protecteur de sa minorité²⁹³ pour la tirer de la main de ceulx de Guyse²⁹⁴ et que ce qu'ilz en avoient faict n'estoit que pour le service de Dieu et du roy, assurant que ceulx qui avoient faict l'entreprinse sur Ricarville ne seroient poinct desadvouez mais recongneuz comme bons serviteurs de la Majesté du roy, et que lesd. habitans ne sçauroient rien faire qui apportast tant de mescontantement à mond. sieur le Prince que de leur pourchasser desplaisir, et dont il se vangeroit cy après, disant sçavoir certainement quoyque les ennemys fissent leur estat d'avoir obtenu la bataille par la prinse de mond. sieur le Prince que toutesfois ilz auroient eu du pire²⁹⁵.

Deux jours après²⁹⁶ led. sieur de Montgomery feit assembler lesd. habitans en la maison de ville, ausquelz il remonstra les causes de sa venue qui estoit pour faire service à Dieu et au roy et pour garder la ville en l'obeissance dud. seigneur contre ceulx qui abuzans du manteau de Sa Majesté ne taschoient que à accroistre leur grandeur, supprimer et abolir le vray service de Dieu et mectre ce royaulme en combustion, demandant ausd. habitans si sa venue leur estoit pas aggreable et que si autrement estoit, il sçavoit bien le lieu d'où il estoit party pour y retorner. A quoy lesd. habitans, qui n'avoient deliberé ce qu'ilz debvoient respondre, ne sçachans ce qu'on leur debvoit proposer, demanderent temps d'un jour pour luy donner response, dont il fut irrité et leur dict en collere : « Commant demandez vous delay pour me dire si je suys le bienvenu si vous me desdaignez et ne me voulez obeyr volontairement je vous feray bien obeyr par force ! » Et leur dict que pour proveoir aux affaires de la ville il failloit proceder à l'election de nouveaux conseilliers au lieu de ceulx qui s'estoient absentez et qu'on eust à luy meubler le chasteau là où il entendoit se retirer, ce qui fut puys après faict, et fut ledit sieur de Basqueville envoyé prisonnier au Havre de Grace.

Lesd. habitans, se voyans ainsy privez de leur liberté et estre constrainctz de porter le joug dud. conte de Montgomery, ne peust aultre chose faire que luy supplier vouloir entretenir la navigation libre, tant pour le commerce de la marchandise que pour la pescherye et laisser vivre lesdictz habitans avec leurs voysins en la plus grande paix qu'il seroit possible sans faire aulcunes cources, invasions et actes d'hostilité tant par mer que par terre, ce qui leur fut par luy promis mais n'en fut rien tenu.

Décembre 1562-janvier 1563. Poursuite des négociations en sous-main des modérés de Dieppe avec des agents du pouvoir royal

En ces jours là le comte de Reingrave estant à Moustierviller qui naguieres avoit escript aud. sieur de Basqueville que les Dieppoys s'estoient mis en peyne perpetuelle de s'estre revoltez et qu'ilz ne se pouvoient saulver qu'ilz ne fussent entierement destruictz et exterminez si le roy y envoioyt son armee, par quoy comme aymant entierement la religion²⁹⁷ et estant protecteur d'icelle le prioyt bien fort de vouloir moyenner dilligemment vers eux qu'ilz se recongneussent²⁹⁸ et rendissent la place au roy, leur promectant qu'ilz n'en auroient aulcun desplaisir en leurs personnes ny en leurs biens et qu'il les feroit mectre en plaine liberté de leurs consciences, envoya lectres ausd. habitans de ce mesme propos²⁹⁹.

Et oultre leur escripvoit que si led. sieur comte de Montgomery vouloit rendre la place, il l'assureroit de le faire remectre en tous ses biens et estatz³⁰⁰ et luy faire donner tel party par le roy et la royne qu'il auroit cause de s'en contanter. Et pour assurance luy bailleroit ses deux nepveuz en hostage, priant ausd. habitans d'envoyer par devers luy deux ou trois d'entre eulx pour conferer avec eulx de chose qui concernoit leur honneur, bien et prouffict, lesquelles lettres lesdictz habitans communiquerent aud. sieur de Montgomery qui n'en tint pas grand compte et dist qu'il ne se fyeroit à telles promesses.

Neantmoings lesd. habitans ne cesserent de conferer de cest affaire avec aulcuns gentilzhommes estant autour de sa personne qui le gouvernoient, lesquelz, après plusieurs propos sur ce tenuz par diverses foys, dirent ausd. habitans qu'ilz trouvoient bon que suyvant lesd. lectres ilz deputassent deux ou trois d'entre eulx pour aller par devers led. comte de Reingrave sans toutesfois en advertir led. comte de Montgomery, se faisans fortz qu'il ne le trouveroit maulvais.

Et proposerent aud. comte de Reingrave que le vray moyen de gaigner led. sieur de Montgomery estoit de luy faire escripre par la royne et luy promectre le restablissement de sa personne en ses honneurs et estatz et luy laisser la garde de lad. ville et chasteau pour le roy, et pour ce faire luy donner estat avec quelques compaignies entretenues. Et furent deleguez pour cest effect trois desd. habitans après avoir obtenu saufconduict du cappitaine Castelan³⁰¹ estant au chasteau d'Arques envoyé par led. comte de Reingrave pour y commander.

Deulx desquelz deleguez s'en allerent à Moustierviller vers led. sieur comte de Reingrave et l'aultre vers monsieur le Mareschal de Vielville³⁰² estant à Rouen que l'on disoit s'estre achemyné avec les forces du roy pour venir mectre le siege devant Dieppe. Lequel sieur Mareschal, après avoir ouy led. delegué en sa charge et entendu l'estat de la ville et comme les choses y estoient passees, luy dist que autrefoys il avoit esté causé de garder lesd. habitans de Dieppe de tumber en ung grand peril qui leur estoit prochain du temps du roy Françoys dernier³⁰³ et que volontiers il leur ayderoit à les retirer de celluy où ilz estoient tumbez, mais qu'ilz se voulsissent ayder eulx mesmes et feit aller led. delegué avec luy à Caudebec³⁰⁴ là où il alla trouver led. comte de Reingrave la veille de la Feste des roys³⁰⁵.

Et après avoir conferé et deliberé ensemble sur cest affaire led. sieur Mareschal dict aud. delegué que led. sieur comte de Reingrave escripvoit aud. sieur comte de Montgomery ce qu'ilz avoient resolu et qu'il eust à luy dire de bouche de la part dud. sieur Mareschal qu'il sçavoit bien qu'il estoit son parant³⁰⁶ et son amy, et d'aultant qu'il l'aymoit il le prioyt bien fort qu'il ne laissast passer une si belle occasion qui se presentoit pour le remectre en la grace du roy et de la royne, et qu'il l'asseuroit que ce qui luy seroit promis luy seroit tenu, exhortant led. sieur Mareschal led. delegué au nom desd. habitans de faire leur debvoir et s'ayder à se mectre hors de la captivité où ilz estoient, et que soubz cest espoir luy et led. sieur comte de Reingrave se deporteroient³⁰⁷ d'envoyer leur forces devant Dieppe et les envoyroit devant le chasteau de Tanquerville³⁰⁸ comme ilz firent.

Lesd. deleguez estans retornez firent le rapport aud. sieur de Montgomery de ce qu'ilz avoient faict en leur voyage, lequel fit semblant d'estre mal contant de ce qu'ilz en avoient faict à son desceu³⁰⁹, et qu'il ne failloit prendre tant de peyne d'appoincter à luy³¹⁰ sans avoir appoincté à monsieur le Prince, sans lequel il n'entendoit à quelque party³¹¹ qu'on luy vouldroit offrir.

Janvier 1563. Action de Montgomery à Dieppe. Nouvelles troupes anglaises. Montgomery ravage le pays de Caux. Expédition de Montgomery à Eu

Peu de temps après led. sieur de Sainct Pol estant en Angleterre repassa la mer au mandement dud. sieur de Mongomery pour exercer le ministere en son eglise.

Led. sieur de Montgomery dressa encores trois compaignies de gens de pied et une compaignie de chevaulx legiers pour lesquelles entretenir il fit assiette³¹² sur lesd. habitans de la somme de quinze mil livres tz.³¹³, dont ilz se sentirent excessivement grevez et furent rigoureusement³¹⁴ contrainctz à la payer, les ungs par la vente et exploitation de leurs biens, et aulcuns reveschez par emprisonnement de leurs personnes et logement de soldatz qu'ilz estoient tenuz de nourrir et sallarier jusques au plain payement de leurs taxes. Il feit aussi prendre et vendre les biens d'aulcuns papistes qui s'estoient absentez de lad. ville et les marchandises d'aulcuns estrangiers, toucha les deniers de la gabelle³¹⁵ du roy et de l'imposition foraine³¹⁶, ensemble ceulx de la rec[e]pte de la viconté apartenant à monsieur le cardinal de Bourbon³¹⁷, seigneur temporel de lad. ville à cause de son archevesché de Rouen, et fist employer les deniers commungs de lad. ville à la fortiffication d'icelle.

Oultre cela luy furent envoyez du Havre de Grace deux compaignyes d'Angloix entretenues par la royne d'Angleterre avec toutes lesquelles compaignies led. sieur de Montgomery feit plusieurs sortyes, courses et ravages par tout le pays circumvoisin et archediacre³¹⁸ plusieurs temples et en print les cloches et aultant de presbtres qu'il pouvoit prendre les admenoit prisonniers les mectant à rançons excessives jusques à viii^c et mil escuz pour ung seul³¹⁹. Il fyt forte guerre à ceulx d'Arques jusques à mener le canon devant le chasteau dud. lieu et a une foys surprint deux compaignyes de gens de pied picardz estans logez dedans le bourg, dont il y en eut plusieurs de tuez et taillez en pieces, les autres mis en fuytte et leurs armes pillees.

Il alla aussy à Assigny ou³²⁰ conté d'Eu³²¹ distant de trois à quatre lieues de Dieppe, où il assaillit une maison forte apartenant au sieur du lieu³²² et enleva grand nombre de grains, comme de mil à douze cens mynes³²³ qu'il trouva aux greniers de lad. maison. Il entreprint davantage d'aller jusques en la ville d'Eu estant à sept lieues de Dieppe, y mena deux gros canons dont il battyt la muraille l'espace de deux ou trois heures, esperant intimider et contraindre les habitans d'icelle ville à venir à quelque composition. Mais comme telle entreprinse fut legierement deliberee et executee contre le conseil de ceulx qu'il appella et contre le gré et volunté desd. habitans qui s'efforcerent l'en destourner, aussy elle succeda mal et à son deshonneur. Car il fut contrainct s'en retorner sans rien faire et ramener ses gens fort laz et affamez, n'aiant faict provision de vivres et laissa ung canon devant lad. ville qu'il ne peust ramener pour ce que les renes rompirent pour le maulvais chemyn à cause d'une pluye continuelle qu'il fyt tout le long du jour.

Oultreplus, il feit la guerre par mer qui fascha plus lesd. habitans que chose quelconque par telles incursions, pillages et actes d'hostilité, il rendyt la ville de Dieppe odieuse à tout le pays, de sorte que chacun n'en desiroit que la ruyne, combien que les habitans d'icelle ne luy aydassent en ceste guerre, synon d'aultant qu'ilz en estoient contrainctz par force.

7 mars 1563. Echec d'une tentative de trahison à Dieppe

Et de faict les gens de guerre estant à Arques firent complot et entreprinse soubz l'adveu et auctorité de monsieur le Mareschal de Brissac³²⁴, lieutenant du roy en ce pays avec les reistres et gens de pied allemandz du comte de Reingrave, de surprendre et saccager lad. ville et pour y parvenir trouverent moien de longue main de praticquer aulcuns cappitaines et soldatz estans dedans lad. ville, dont ung nommé Carrel sergent major qui fermoit et ouvroit les portes d'icelle fut suspitionné, le cappitaine La Mulle, le cappitaine Hocqueton³²⁵ et le portier ordinaire de lad. ville.

Et pour mieulx executer leur entreprinse attendirent le temps et l'opportunité que led. sieur comte de Montgomery fust party et embarqué pour aller à Caen trouver monsieur l'Admiral³²⁶ qui estoit là arrivé avec son armee, laissant led. sieur comte en son lieu le sieur de Presles pour commander en lad. ville, qui fut au commancement du moys de mars³²⁷.

Et se tenoient les ennemys si assurez de venir à chief de leur conspiration que le jour mesmes qu'ilz s'efforcerent de l'executer le bruict fut espandu partout jusques à Rouen, Neufchastel, Eu et Abbeville que lad. ville de Dieppe estoit prinse et mise à sac, tellement que de tous costez les gens y accouroient pour venir au pillage.

Mais Dieu, qui s'estoit tousjours monstré protecteur de lad. ville, continuant sa faveur accoustumee, la delivra de ce peril qui estoit bien le plus grand et le plus apparant où elle ayt esté durant ces troubles. Car il suscita des gens de bien qui descouvrirent les menees, ruses et finesses des ennemys jusques à sçavoir le nombre de gens, les moyens qu'ilz debvoient tenir, le propre jour qu'ilz pretendoient assaillir lad. ville et les endroictz par où ilz vouloient venir, dont lesd. habitans aians bon et certain advertissement, mirent la main aux armes pour se deffendre, ce qu'ilz n'avoient faict depuis le temps que led. sieur de Montgomery estoit venu en lad. ville, misrent de nuyct centinelles à cheval hors de lad. ville, se tindrent bien sur leurs gardes et firent si bon guet que les ennemys qui s'estoient assemblez et venuz tant de Rouen que de Neufchastel et Eu avecq ceulx d'Arques et lesd. reistres et Allemans à pied faisans jusques au nombre de plus de huict mil hommes venans en trois bandes par trois divers endroictz et approchans lad. ville et la citadelle pour la surprendre par une nuyct une heure ou deux devant le jour, pensant trouver le guet endormy et les portes ouvertes, trouverent en teste sur les murailles de la ville, boulevartz³²⁸ et rampars de la citadelle lesd. habitans tous en armes avec les autres gens de guerre. Nul desquelz voyant le courage desd. habitans ne feyt autre semblant que de vouloir vivre et mourir pour la deffense de lad. ville. Si furent lesd. ennemys après le jour apparu descouvertz et saluez à coupz d'artilleryes, tellement qu'ilz n'ozerent approcher plus près que la portee du canon. Et après s'estre monstrez et pourmenez quelque temps, usans de criz et exclamations de derision et mocquerye contre ceulx de lad. ville, s'en retournerent avec leur courte honte et furent lesd. sergent major et aultres suspitionnez de la trahison et vendue³²⁹ de lad. ville constituez prisonniers et leur proces faict extraordinairement. Mais ilz n'en peurent estre convaincuz³³⁰.

Mars 1563. Plaintes des Dieppois auprès de l'Amiral de Coligny au sujet de Montgomery. Ils obtiennent gain de cause

Peu de temps au precedent lesd. habitans envoyerent deux notables personnages d'entre eulx par devers mond. sieur l'Admiral estant à Caen auquel lesd. deleguez presenterent lettres missives de la part desd. habitans avec leurs tres humbles recommandations et leur service, et suyvant la charge à eulx donnee et les memoires à eulx baillez par escript luy remonstrerent :

Premierement que lesd. habitans avoient pour lors plus de quarante vaisseaulx en divers voyage de marchandise et qu'ilz consistoi[en]t³³¹ non seullement la pluspart de leurs biens mais aussi la meilleure force de leurs hommes en grand nombre de marchans et marriniers estans dedans, de sorte que la perte de tant d'hommes et de biens et de navires, si elle advenoit, feroit une bresche à la ville de Dieppe presque irreparable.

Et pour ce que monsieur le comte de Montgomery avoit fait equipper ou bien donné congé d'equiper et armer quelques navires en guerre, lesquelz s'ilz executoient leur entreprinse pourroient estre cause que tout ce grand nombre de vaisseaux seroit prins ou arresté³³² et par mesme moyen la mer close et inaccessible à toute trafficque³³³ de marchandise, ce qui venoit aussy plus mal à propos d'aultant que la saison de la pescherye des maquereaux estoit prochaine³³⁴, pour laquelle est necessaire envoyer querir le sel en Brouage³³⁵, ce qui seroit quasi impossible si on rendoit les Bretons ennemys, comme desjà on en avoit prins aulcuns avec ce qui aultant en adviendroit il des Gascons et Flamans pour la traicte des vins et des bledz dont la necessité estoit presente en lad. ville et n'en pouvoit on recouvrer ne tirer d'ailleurs.

A ces causes, et que la pescherye et la [sic] marchandises³³⁶ sont les deux principalles commoditez dont lad. ville est substantee³³⁷ et entretenue et lesquelles defaillantes s'ensuyvroit la totalle ruyne desd. habitans et d'infiny pauvre peuple circumvoysin luy supplioyent que son bon plaisir fust faire cesser toute hostilité et pillerye par la mer, à ce que la marchandise et la pescherye peussent demeurer libres ausd. habitans en leurs cours accoustumé et très necessaire.

Secondement, luy supplioyent que aiant esgard à la petite puissance de lad. ville et à la despense excessive qu'elle avoit faict en ceste guerre, enquoy leur avoit costé pour l'esté passé plus de soixante mil livres³³⁸ et puys³³⁹ trois mois encores plus de vingt mil³⁴⁰ avec ce que chacun y estoit privé de la jouyssance de son revenu et les marchantz empeschez de trafficquer il luy pleut de les soulager de la grande charge de gens de guerre, et des taxes excessives qui à ceste occasion s'imposoient sur eulx.

Finablement luy remonstrerent les excès, pilleryes, extortions et meurtres qui par chacun jour commectoient plusieurs soldatz tant dedans la ville que ès environs sur ceulx mesmes qui ne firent oncques actes d'ennemys contre la religion, ce que redondoit³⁴¹ non seullement au grand scandal de l'Evangille, lequel ilz faisoient servir de pretexte à leurs iniquitez, mais aussy à la grande diminution des vivres et commoditez dont la ville avoit accoustumé d'estre fournye du pays cicumvoisyn, lequel par ce moien estoit demeuré pillé et desert, la ville odieuse à tous ses voysins et Dieu publicquement offensé dont n'estoit faict aulcune justice.

A quoy pour l'heure mond. sieur l'Admiral ne fyt autre response synon qu'il les avoit entenduz et que à chacun poinct en brief il leur satisferoit, ce qui fut differé jusques après la prinse du chasteau de Caen. Et depuis ayant esté adverty par lesd. deleguez de la trahison que l'on vouloit commectre sur lad. ville de Dieppe et du meurtre malheureusement commis à la personne de Nicolas Felle, principal canonnier de lad. ville, par l'enseigne³⁴² du cappitaine Vouilly à ceste seulle occasion que led. Felles reprenoit ung soldat du tort qu'il faisoit à ung pauvre marchant auquel il vouloit oster deux chevaulx.

A cause de quoy lesd. habitans furent si irritez que peu s'en faillut qu'il ne s'en ensuyvist ung merveilleux discord. Il depescha lesd. deleguez usant de telle response en effect et substance :

« Messieurs, estant de besoing que monsieur le comte de Montgomery soit retenu par deça pour le gouvernement de Caen et aultres affaires de plus grande consequence, je ne veulx pas laisser la ville de Dieppe despourveue d'un bon et suffisant chief, parquoy j'ay esleu par l'advis et conseil des seigneurs estans icy le cappitane Gausseville³⁴³, present, pour gouverneur d'icelle pour gentilhomme propre et très suffisant à telle charge, avec lequel demeureront seullement deux compaignyes françoyses de gens de pied et quelque nombre de hargoulletz que les habitans de la ville pourront faire d'entre eulx mesmes, auquel cappitaine Gausseville je commande de contenir les soldatz en toute bonne discipline, ne leur permectre aulcun excès, pillerye ou extortion et des delinquans executer severe justice, vous traicter doulcement et paisiblement et de vostre part reciprocquement j'entendz que vous luy soyez bien obeyssans bien payans les soldatz affin qu'ilz n'aient nulle excuse vers la justice si estans bien payez ilz retornent à leurs excès et pilleryes.

Et brief que de tout vostre pouvoir ayez à vous employer à la deffense de ceste cause de Dieu et du roy sans faire comme plusieurs villes lesquelles aians espargné une partie de leurs biens à se maintenir en ceste saincte entreprinse ont perdu en fin le tout avec la liberté de l'Evangille la vye de leurs hommes, l'honneur de leurs femmes et l'espoir de leurs enffans. Vous sçavez que moy, mes freres³⁴⁴ et tant d'aultres grandz seigneurs ne sont pas en meilleure condition que vous mesmes. Ilz y exposent leurs vyes tous les premiers et puys tous leurs biens, de sorte que nul d'entre eulx ne se peult vanter d'un poulce de terre. Cependans courans avec eulx en ung mesme dangier vous debvez fortiffier comme eulx en l'equité de la cause et en l'espoir du secours du Celeste [sic], lequel en fin nous appert si manifestement que nous ne sçaurions nyer les miracles evidentz de Dieu que de jour en jour se faict à l'honneur et advancement de son Eglise et à la ruyne et confuzion de ses ennemys. Et les principaulx chiefz des adversaires sont mortz miraculeusement la pluspart³⁴⁵, les autres nos prisonniers³⁴⁶, les autres mallades³⁴⁷ et en desespoir de leur santé. La meilleure part de Normandye et la plus forte est nouvellement reduicte et le reste est en chemyn de pareil espoir.

Brief, la faveur de Dieu envers nous est pour le jourd'huy si apparante par la continuelle prosperité de noz affaires³⁴⁸ que outre l'espoir que nous avons de l'aultre vye, nous pouvons certainement n'en brief³⁴⁹ attendre plus que suffisante recompance en ce monde, mesmes de si peu de biens qui sont par nous despensez, quictez ou perduz en la suytte de si juste cause. Parquoy que chacun s'efforce plus que jamais comme desjà approchans du bout de la course ceulx qui ont bien faict continuant de bien en mieulx, et ceulx qui se sont portez froydement se rechauffans, de sorte que mesme ville ne soit plus que mesme corps, et si quelques membres s'en sont auclunement separez, se reunissent pour leur propre conservation³⁵⁰. En quoy faisant ne vous faillira jamais tout l'ayde³⁵¹ et services que je vous pourray faire comme je me suys par cy devant tousjours monstré principal appuy et vray protecteur de vostre ville³⁵². »

Voylà ce que respondyt monsieur l'Admiral et donna charge ausd. deleguez de dire de sa part ausd. habitans. Et pour ce qu'il n'avoit sonné mot³⁵³ de la guerre qui se faisoit par mer³⁵⁴, lesd. deleguez luy voulurent bien ramentevoir cest article. A quoy respondyt qu'il entendoit bien y donner quelque bon ordre et faire que la marchandise et la pescherye demeureront aultant qu'il seroit possible en leur cours accoustumé mais qu'il n'en avoit encores communicqué avec les seigneurs, ce qu'il alloit faire et en manderoit en brief ausd. habitans certaine resolution.

Suyvant ceste depesche³⁵⁵ lesd. deleguez s'en retornerent avec led. sieur de Gausseville, cappitaine de Fescamp, lesquelz arriverent à Dieppe le propre jour que les ennemys s'estoient presentez devant la ville pour la surprendre, qui fut le vii de mars³⁵⁶. Et le neufiesme dud. mois³⁵⁷ led. sieur de Gausseville en l'assemblee commune des conseilliers, manans et habitans de lad. ville fut receu d'un commun accord pour commander tant en la ville que au chasteau suyvant les lettres de monsieur l'Admiral qu'il presenta et furent levés en lad. assemblee pour raison de quoy monsieur de Presles³⁵⁸ se delibera s'embarquer et mener à mond. sieur l'Admiral les compaignyes de gens de guerre estans en lad. ville, y laissant seullement deux compaignyes et mena avec luy madame la contesse de Montgomery³⁵⁹ avec grandz biens que led. sieur comte son mary avoit amassez durant le temps qu'il fut à Dieppe que l'on estimoit à plus de quarante mil livres³⁶⁰ et lequel avoit faict faire une chesne d'or pesant douze cens ducatz³⁶¹ qu'il appelloit sa Geneve³⁶² et ung buffet de vaisselle d'argent.

Avril 1563. Proclamation de la paix. Nouvel incident iconoclaste à Dieppe. Nouvelles négociations de Dieppe avec le pouvoir royal

Après le partement dud. sieur de Presles, la ville fut gouvernee par led. sieur de Gausseville jusques à ce que les nouvelles de paix furent apportees par monsieur de la Curee³⁶³, gentilhomme ordinaire de la Chambre du roy, qui arriva en lad. ville le mardy des festes de Pasques xiii^e d'avril³⁶⁴, envoyé de la part de mond. sieur le Prince avec lettres dud. sieur comte de Montgomery et passeport de monsieur le Connestable, lequel fut receu à grand joye pour les bonnes nouvelles qu'il apportoit de la paix tant desiree.

Toutesfois pour le doubte que aulcuns avoient qu'il ne fust venu pour oster les temples à ceulx de la religion reformee, les soldatz estans en lad. ville et le commun peuple se mirent à casser et briser toutes les vittres desd. temples qui estoient fort belles et riches et à rompre les clostures des chappelles³⁶⁵ et y eussent continué à demolyr et abbattre lesd. temples si led. sieur de la Curee, lesd. cappitaine Gausseville et les gens de bien de la ville n'y eussent resisté.

Le lundy xv^e jour d'avril³⁶⁶ led. sieur de la Curee feit publier l'edict de la paciffication par les carrefours de lad. ville et donnerent ordre lesdictz habitans que les Angloix se retirerent de lad. ville, lesquelz s'en allerent au Havre de Grace. Pareillement fut donné congé aux compaignies françoyses et après led. sieur de la Curee aiant promis ausd. habitans de continuer l'exercice de leur religion dedans le temple jusques à ce que par le roy autrement en eust esté ordonné et assigné autre lieu ausd. habitans suivant l'edict, il s'en alla à Rouen par devers monsieur le Mareschal de Brissac auquel il fyt rapport de la prompte obeyssance qu'il avoit trouvee ausd. habitans, de quoy mesme il advertyt la royne.

Le xviii^e dud. mois³⁶⁷ lesd. habitans receurent lettres dud. sieur Mareschal de Brissac pour recepvoir le cappitaine La Grange³⁶⁸ pour commander en ladite ville et au chasteau d'icelle menant avec luy une compaignie de gens de pied pour y tenir garnison, ce que ne voulurent consentyr lesd. habitans, non pas tant pour le desir de maintenir et garder leurs privileges que pour craincte du tumulte et sedition qui en eust peu advenir, aiant entendu que les soldatz dud. cappitaine La Grange estoient mal conditionnez menans avec eulx un train de putains et que aulcuns d'iceulx qui estoient entrez dans lad. ville avoient usé de menaces de chasser les ministres hors de lad. ville et touché l'honneur de mond. sieur le Prince et de monsieur le Chancelier³⁶⁹,dont ilz firent faire information qu'ilz envoyerent à mondit sieur le Mareschal de Brissac, luy supplians de differer à envoyer ledit cappitaine La Grange avec sad. compaignie jusques après avoir entendu sur ce le bon plaisir du roy par devers lequel ilz avoient envoyé.

Et ce pendant, affin qu'ilz ne demeurassent sans gouverneur, d'aultant que le cappitaine Gausseville se vouloit retirer par devers monsieur l'Admiral, qu'il luy plaist leur envoyer led. sieur de la Curee, ce que leur octroya ledit sieur Mareschal. Et lequel sieur de la Curee venu en lad. ville feit tant pour eulx que après avoir escript en leur faveur tant à la royne que à monsieur le Prince et aultres seigneurs du Conseil, il luy fut mandé par la royne qu'il demeurast en lad. ville pour y commander.

Et finablement impetrerent du roy nonobstant la resistance dud. sieur Mareschal de Brissac, que led. cappitaine La Grange ne viendroit à Dieppe, et d'avantage que bien que monsieur de La Malleraye³⁷⁰ eust esté depesché et se fust achemyné jusques à Charlemesnil³⁷¹ distant de deux lieues seullement de lad. ville³⁷², là où lesd. habitans avoient envoyé aulcuns d'entre eulx pour le recepvoir à gouverneur et luy presenter leur service et obeyssance.

7 août 1563. Venue du roi Charles IX et de la Cour à Dieppe. Pacification de la ville et rétablissement du culte catholique. Le protestant pressenti pour être capitaine du château est écarté pour un catholique, René de Sigogne. Les protestants se voient assigner un lieu de culte

Neantmoings il fut contremandé³⁷³ et leur fut laissé pour gouverneur led. sieur de la Curee faisant profession ouverte de l'Evangille se tenans bienheureux de jouyr d'un tel bien que la ville de Dieppe estoit seulle entre toutes les evangelicques de ce royaulme ayant gouverneur de sa religion. Et lequel sieur de la Curee les exempta de soldatz, se contantant seullement d'avoir vingt hommes pour sa garde qu'il choisyt en lad. ville et leur dura cest heur jusques à la venue et nouvelle entree du roy en lad. ville qui fut le vii^e jour d'aoust mil v^C Lxiii³⁷⁴.

Car après que le roy eut reprins et reduict en son obeyssance sa ville françoyse de Grace³⁷⁵ occupee et detenue par les Angloix, la royne sa mere manda aud. sieur de la Curee que le roy voulloit venir faire son entree en la ville de Dieppe et qu'il eust à advertyr lesd. habitans de se preparer à le recepvoir sans grande pompe ne despense superflue, et que Sa Majesté ne demandoit que le bon cueur et obeissance de ses subjectz. A quoy lesd. habitans firent debvoir en telle promptitude et allegresse qu'encores qu'ilz n'eussent que trois ou quatre jours de loysir³⁷⁶ ilz dresserent theatre, mirent en place grand nombre d'artillerye pour saluer le roy et firent sortir unze ensegnes³⁷⁷ de gens de pied en armes au devant de Sa Majesté en bon ordre et forme de bataillon, qui donna esbahyssence aux gens de la Court de veoir ung si grand nombre de gens aguerys sortir d'une si petite ville et dont le roy se contenta fort et fut receu à grand joye par autre bon nombre de citadins à cheval en toute reverence, humilité, subjection et obeyssance deue à Sa Majesté, luy presentans à la porte ung poisle³⁷⁸ de veloux rouge frangé de soye de mesme couleur porté par quatre anciens conseilliers d'icelle ville.

Ne fault oblyer que les ennemys et malveillans de lad. ville et de l'Evangille avoient faict courir ung bruict partout que le roy ne venoit à autre fin et intention que de faire la vengeance de la revolte comme ilz l'appeloient de lad. ville de Dieppe et de la mort du cappitaine Ricarville. Et pour irriter le roy contre lad. ville et la rendre plus odieuse la chargerent de calumnye, impostures et mensonges, faisans semer le bruict que lad. ville se preparoit et mectoit en armes pour faire resistence à Sa Majesté et luy fermer les portes et qu'on avoit tué ung procureur du roy³⁷⁹ en lad. ville. Qui plus est le roy estant à disner à une lieue de lad. ville le jour qu'il feyt sad. entree luy fut faict rapport qu'on avoit tué son mareschal des logis³⁸⁰, ce qu'il congneut bien estre faulx.

Desquelz faulx bruictz lesd. habitans ne s'estonnerent oncques, aiant en eulx le tesmoignage de bonne conscience et se confiens en leur innocence et à la bonté et clemence du roy. Et ne laisserent à se monstrer fermes et constantz en la profession de l'Evangille, laquelle ilz firent ouvertement, tant de bouche que de faict devant ceulx mesmes qui en estoient adversaires, qui furent contrainctz de leur en donner louange. Et ne cesserent à faire presches publicques au temple, mesmes devant les gens de la Court, jusques aud. jour que le roy feit son entree.

Le landemain viii^e jour par ung dymanche³⁸¹ le roy et la royne sa mere allerent en grand magnificence au temple de Sainct Jacques accompagnez de monsieur d'Orleans³⁸², messieurs les Cardinaulx de Bourbon³⁸³ et de Guyse³⁸⁴, messieurs le duc de Montpensier³⁸⁵ et prince de La Roche sur Yon³⁸⁶, monsieur le Connestable, messieurs les Mareschaulx de Montmorancy³⁸⁷, de Brissac et de Bourdillon³⁸⁸, le sieur de Boisy³⁸⁹ et aultres chevaliers de l'ordre, les gentilzhommes de la Maison du roy portans leur bec de faulcon³⁹⁰ et les archers de la garde dud. sieur. Et là fut restablye la messe et chantee en grande solennité. Neantmoings ceulx de la religion reformee ne laisserent à pourchasser envers le roy qu'il leur fust baillé l'un des deux temples de lad. ville³⁹¹ pour l'exercice de leurd. religion.

Et à ceste fin led. jour à l'issue du disner du roy, après luy avoir faict la harangue et le present d'un grand plat et d'un vaze d'argent doré, et avoir donné tant à luy que à la royne, mond. sieur d'Orleans et plusieurs aultres seigneurs plusieurs perroquetz, guenons et sagouyns³⁹² luy fut presenté requeste par escript par le procureur qui portoit la parolle pour eulx. Les papistes au contraire avoient presenté requeste pour estre restabliz en leurs temples et pour faire deposer de leurs estatz les officiers et conseilliers de lad. ville estans de lad. religion reformee et estre gouvernez à l'advenir par gens de leur religion, faisans plusieurs plainctes des tortz et oultrages et ravissementz de leurs biens qu'ilz disoient leur avoir esté faictz durant les troubles passez. Sur quoy led. jour mesme lesd. officiers conseilliers et aultres de la religion reformee en bon nombre furent appellez au Conseil tenu par le roy et la royne presens les seigneurs cy dessus nommez et l'evesque de Valence³⁹³ et eulx ouyz sur la requeste desd. papistes dirent qu'ilz estoient prestz d'eulx justifier desd. plainctes de y respondre en la presence des plaintifz.

Si fut commandé ausd. sieur de la Curee present les envoyer querir, ce qu'il fyt. Et toutesfois ne se comparut aulcun après les avoir longuement attenduz, par quoy fut respondu ausd. habitans sur leur requeste tant par le roy que la royne qu'il n'y avoit ville en France à qui le roy accordast plus voluntiers ung temple pour l'exercice de lad. religion que à lad. ville de Dieppe, congnoissant bien que la plus grande partye desd. habitans et les principaulx suyvoient lad. religion en la liberté de laquelle il vouloit bien les entretenir suyvant son edict de la paciffication des troubles, mais desirant qu'icelluy edict fust gardé en tout et par tous selon sa forme et teneur, il ne leur pouvoit octroyer aulcun temple³⁹⁴ affin que cela ne fust tiré à consequence pour les autres villes et ne donnast ouverture de rompre le edict à ceulx mesmes qui sont de religion contraire³⁹⁵. Par quoy se debvoient contanter d'avoir ung lieu en lad. ville hors les temples qui leur seroit assigné par led. sieur Mareschal de Brissac. Au demeurant que son vouloir estoit que tous les officiers et conseilliers demeurassent en leurs estatz, et mesmement que led. sieur de la Curee leur demeureroit pour gouverneur, leur commandant de luy obeyr et se contenir paisiblement et en toute modestie sans empescher les autres en l'exercice de la religion catholicque romaine. Et qu'en se monstrant envers luy bons et obeyssans subjectz il se monstreroit tousjours bon prince envers eulx, les entretiendroit en leurs libertez et privileges et les gratiffieroit en tous³⁹⁶ leurs affaires, leur declarant toutesfois que son intention estoit de mectre une compaignie de gens de pied en garnison en lad. ville non pour les charger aulcunement³⁹⁷ mais pour la deffense de lad. ville durant la presente guerre contre les Angloix³⁹⁸, et laquelle compaignie seroit entretenue à ses despens. Aussy qu'il vouloit que la citadelle fust desmolye parce qu'il avoit trouvé par son Conseil qu'il estoit impossible de la faire forte et la deffendre contre l'ennemy pour raison de l'assiette³⁹⁹ d'icelle, mais qu'il ne cousteroit rien ausd. habitans pour lad. demolition et qu'il entendoit que les pierres des boulevertz de lad. citadelle fussent employees à faire une gectee au havre⁴⁰⁰ de lad. ville.

Lesd. habitans estoient fort joyeulx que led. sieur de la Curee leur demeuroit pour gouverneur mais pour aultant qu'il se monstra trop affectionné aud. conseil envers ceulx de la religion reformee. Et sur ce que la royne luy commandoit qu'il eust à contenir le peuple en l'obeissance du roy et en union et concorde tant d'un costé que d'aultre sans respect de⁴⁰¹ la religion, il usa de ces motz qu'il se faisoit bien fort qu'il n'adviendroit aulcun trouble ou sedition en lad. ville de la part de ceulx qui estoient là presens. Et quant à ceulx de la religion contraire, qu'il les garderoit à son pouvoir de toute offense qu'on leur vouldroit faire et les conduyroit s'ilz avoient besoing de son assistence pour maintenir leur religion jusques à huict ou dix pas près du temple mais qu'il ne passeroit poinct plus oultre et n'yroit jamais à la messe⁴⁰² puysque le roy luy octroioyt de vivre en la liberté de sa conscience. On fut tout esbahy que le jour mesme ce conseil fut changé de le laisser gouverneur en lad. ville et y fut estably en son lieu ledit sieur de La Mailleraye, visadmiral de France et ordonné que le sieur de Sigongne⁴⁰³, cappitaine des gens de pied avec sa compaignie seroient en garnison en lad. ville.

Mais la grace à Dieu led. sieur de La Mailleraye, encores qu'il tienne le party de la religion romaine, a usé de telle prudence et modestie au faict dud. gouverneur, et led. sieur de Sigongne en son absence, qu'ilz ont donné occasion à tous lesd. habitans tant d'une religion que de l'autre de s'en louer et se tenir très heureux de recepvoir leurs commandementz, car jusques ici on a vescu aussy paisiblement soubz eulx en lad. ville que l'on pourroit desirer, sans qu'on y ayt veu aulcun trouble, division ou querelle, soit à cause de la religion ou desd. soldatz.

Le dixisesme jour dud. mois led. sieur Mareschal de Brissac requis par lesdictz habitans de leur assigner lieu en lad. ville pour l'exercice de lad. religion reformee donna la charge aud. sieur de La Mailleraye de veoir et visiter les lieux les plus commodes de lad. ville et en faire rapport au Conseil privé du roy⁴⁰⁴, ce qu'il feit et sur ce fust arresté aud. Conseil tenu le mesme jour avant le partement du roy et publié par les carrefours de lad. ville ce qui s'ensuyt :

« De par le roy. Désirant Sa Majesté l'entretenement⁴⁰⁵ de l'edict par luy dernierement faict pour la paciffication de son royaulme, bien et repos de ses bons et loyaulx subjectz et pour lequel tant mieulx establir en ceste ville de Dieppe il a prins la peyne d'y venir, en laquelle pour l'effect dessusd. il a ordonné ce qui s'ensuyt. Premierement, veult et entend Sad. Majesté que toutes injures et offenses faictes et advenues durant les troubles passez soient oubliees, deffendant à tous s'entrereprocher aulcune chose du passé, dire ne provocquer injure ne offense de faict ne de parolle sur peyne de la vye, mais vivre ensemble comme amys, parans, et concitoyens en amytié et toute reconciliation, que les temples soient remis en mains des ecclesiasticques pour en user et y faire l'exercice de leur religion accoustumee et jouyr aussy de tous leurs biens, maisons, et possessions sans empeschement quelconque et sans que ceulx de la religion pretendue reformee puissent faire aulcun presche èsd. temples ny aultre exercice de leur religion pour lequel exercice faire Sadite Majesté leur a ordonné et ordonne la maison et place de la Charité⁴⁰⁶ satisfaisant par eulx aux charges qui sont dessus, dont il entend qu'ilz puissent semblablement user librement sans aulcun empeschement, le tout selon le contenu oud. interdict et pour aultant qu'il a esté par Sad. Majesté proveu que ung chacun puisse librement se retirer et vivre en sa maison en quelque lieu qu'elle soit et là jouyr de ses biens, est enjoinct très expressement à toutes personnes venues en ceste ville pour le faict de la religion et à l'occasion desd. troubles qu'ilz aient dedans huict jours après la publication de ces presentes à se retirer d'où il est et à tous vagabondz et gens sans adveu⁴⁰⁷ aussy vuyder lad. ville dedans led. temps sur peyne de la hart⁴⁰⁸. En ce non comprins les marchans estrangiers et autres facteurs⁴⁰⁹ qui peulvent avoir affaire pour leur trafficques que Sad. Majesté entend estre benignement traitez et recueilliz⁴¹⁰ en ceste ville et y pouvoir librement faire leurs commerces sans aulcun empeschement en faisant par eulx entendre et declarant au gouverneur de lad. ville la cause de leur demeure en icelle. Donné à Dieppe le dixiesme jour d'aoust, l'an mil v^C soixante trois⁴¹¹. Signé par le roy. De L'Aubespine⁴¹². »

⸎⸎⸎⸎⸎

Notes

1 Théodore de Bèze (1519-1605), important théologien protestant.

• ASSELINE David (éd. par HARDY, GUERILLON et SAUVAGE), Les antiquitez et chroniques de la ville de Dieppe, tome 1, Dieppe : A. Marais et A. Leblanc, 1874.

• BANDERIER Gilles, Agrippa d'Aubigné et Dieppe : un document en marge de l'Histoire universelle, in Annales de Normandie, 52^e année, n° 1, 2002, p. 3-13.

• BEZE Théodore de, Histoire ecclesiastique des églises réformées au royaume de France, tome 2, Lille : Leleux, 1841.

• CARLOIX Vincent, Mémoires de la vie de François de Scépeaux, sire de Vieilleville, Paris : Foucault, 1822.

• DAUVIN Antoine, Un mythe de concorde urbaine ? : le corps de ville de Caen, le gouverneur et le roi durant les guerres de Religion (1557-1594), thèse de l'Université de Caen Normandie, 2021.

• DAVAL Guillaume et Jean (éd. par Emile LESENS), Histoire de la réformation de Dieppe, 1557-1657, Rouen: E. Cagniard, 1878, tome I.

• DESMARQUETS Jean-Antoine-Samson, Mémoires chronologiques pour servir à l'histoire de la ville de Dieppe et à celle de la navigation françoise, tome 2, Dieppe : Dubuc, 1784.

• GUIBERT Michel Claude, Mémoires pour servir à l'histoire de la ville de Dieppe (éd. par M. HARDY), tome 2, Dieppe : A. Renaux et A. Leblanc, 1878.

• LA FERRIERE Hector de la, La Normandie à l'étranger : documents inédits relatifs à l'histoire de Normandie tirés des archives étrangères, XVI^e et XVII^e siècles, Paris : A. Aubry, 1873.

• LE ROUX Nicolas, « Pouvoir royal, noblesse et autorité locale : la Normandie au temps des guerres de Religion », in HUGON Alain et BOLTANSKI Ariane (dir.), Les noblesses normandes, XVI^e-XIX^e siècle, Rennes: Presses universitaires de Rennes, 2001, p. 93-110.

• LE TOUZE Isabelle, Suivre Dieu, servir le roi : la noblesse protestante bas-normande, de 1520 au lendemain de la révocation de l'Edit de Nantes, thèse de doctorat de l'Université du Mans, 2012.
  

Carte du pays de Caux (détail) extraite de l'exemplaire manuscrit des

Antiquitez et chroniques de la ville de Dieppe de David Asseline, 1682,

conservé à la Bibliothèque municipale de Dieppe (cote Mss 1)